ભાવનગર શહેરના લીલાસર્કલ વિસ્તારમાં રોડ ઓળંગી રહેલ દંપતિને બાઈક ચાલકે અડફેટે લેતા વૃદ્ધનું ઘટના સ્થળે મોત થયું હતું. જયારે ગંભીર રીતે ઘવાયેલ પત્નીને સારવાર અર્થે ખાનગી હોસ્પિટલમાં ખસેડવામાં આવી છે.

આ બનાવ અંગે જાણવા મળતી વિગતો અનુસાર ભાવનગર શહેરના શહેરના લીલાસર્કલ વિસ્તારમાં આવેલ સ્વસ્તિક આર્કેડ એ-વિંગ ફ્લેટનં- ૪૦૨ માં રહેતા કિશનલાલ ગુપ્તા (ઉ.વ.૬૦) અને તેમના પત્ની ઈન્દિરાબેન ગતરાત્રીના સમયે ઘર નજીક આવેલ વારાહી હોસ્પિટલ પાસે રોડ ઓળંગી રહ્યા હતા. તે વેળાએ પુરઝડપે આવેલ બાઈક નં. જીજે ૦૪ ઈબી ૬૦૬૬ ના ચાલકે દંપતિને અડફેટે લેતા રોડ પર પટકાયેલ દંપતિને ગંભીર ઈજા પહોંચી હતી. જ્યારે બાઈક ચાલક પોતાનું બાઈક લઇને ફરાર થઇ ગયો હતો. જે દરમ્યાન વૃદ્ધ કિશનલાલને તત્કાલીક સારવાર અર્થે હોસ્પિટલમાં ખસેડવામાં આવ્યા હતા. જયાં ફરજ પરના તબીબે વૃદ્ધને તપાસી મૃત જાહેર કર્યા હતા. જયારે ગંભીર રીતે ઘવાયેલ વૃદ્ધાને સારવાર ખસેડાયા હતા. આ અંગે વૃદ્ધના પુત્ર કપીલ કિશનલાલ ગુપ્તા (ઉ.વ.૩૬) એ બાઈક ચાલક વિરુદ્ધ ભરતનગર પોલીસ મથકમાં ફરિયાદ નોંધાવતા પોલીસે ગુનો નોંધી ધોરણસરની કાર્યવાહી હાથ ધરી હતી.