ગુજરાત રાજ્યના શિક્ષણ વિભાગે વિદ્યાર્થીઓના નામ પાછળ પિતાના નામની જગ્યાએ માતાનું નામ લખવાની મંજૂરી આપીને એક મહત્વપૂર્ણ નિર્ણય લીધો છે. નામ સુધારવાની પ્રક્રિયાને સરળ બનાવવા માટે આ જવાબદારી હવે જિલ્લા શિક્ષણ અધિકારીઓને સોંપવામાં આવી છે.

અગાઉ નામ સુધારવા માટે શિક્ષણ વિભાગમાં રજૂઆત કરવી પડતી હતી, પરંતુ નવા નિયમો અનુસાર જો પિતાનું મૃત્યુ થયું હોય તો મરણ પ્રમાણપત્ર રજૂ કરીને માતાનું નામ લખાવી શકાશે.

આ ઉપરાંત છૂટાછેડા અથવા માતાના પુનઃ લગ્ન જેવા કિસ્સાઓમાં પણ વિદ્યાર્થીઓ માતાનું નામ લખાવી શકશે. આ માટે અરજદારોએ જરૂરી પુરાવા અને દસ્તાવેજો રજૂ કરવાના રહેશે.

જિલ્લા શિક્ષણ અધિકારી રોહિત ચૌધરીએ આ અંગે માહિતી આપતાં જણાવ્યું હતું કે, "ગુજરાત માધ્યમિક અને ઉચ્ચત્તર માધ્યમિક શિક્ષણ બોર્ડ દ્વારા વિનિયમ 12-કમાં સુધારો કરવામાં આવ્યો છે. હવે વિદ્યાર્થીઓ તેમના નામ પાછળ માતાનું નામ પણ લખી શકશે. આ સુધારાથી છૂટાછેડા અને પુનઃ લગ્ન જેવા કિસ્સાઓમાં વિદ્યાર્થીઓને ઘણી રાહત મળશે."