તહેવારોની સિઝનમાં ભારતમાં ખરીદીનો ધમધમાટ તેજ રહ્યો છે, પરંતુ આ વખતે ગ્રાહકોની પ્રાથમિકતાઓમાં મોટો બદલાવ આવ્યો છે. હવે લોકો માત્ર સસ્તા વ્યાજદર નહીં, પરંતુ સુવિધા અને ઝડપને વધુ મહત્ત્વ આપી રહ્યા છે. આઇફોન ખરીદવો હોય કે ઘરને નવો લુક આપવો હોય, લોકો હવે લાંબી બેન્ક પ્રક્રિયાઓ ટાળીને ઇન્સ્ટન્ટ લોનનો વિકલ્પ પસંદ કરી રહ્યા છે.

ઝડપી અને સરળ લોન બની પહેલી પસંદ
Paisabazaar ના તાજેતરના સર્વેક્ષણમાં આ બદલાવ સ્પષ્ટ થયો છે. ૪૨% ગ્રાહકોએ ઓછા વ્યાજદરને બદલે ઇન્સ્ટન્ટ લોન આપનારા અને ઓછા પેપરવર્ક વાળા લેન્ડર્સને પસંદ કર્યા. માત્ર ૨૫% લોકોએ જ કહ્યું કે તેમના માટે વ્યાજદર સૌથી મહત્ત્વપૂર્ણ ફેક્ટર હતો.

ડિજિટલ તરફ ઝોક: 
લગભગ ૮૦% ગ્રાહકોએ જણાવ્યું કે તેઓ ડિજિટલ પ્લેટફોર્મ્સ દ્વારા લોનની સરખામણી કરવા અને અરજી કરવાનું પસંદ કરે છે. ૫૩% ઉત્તરદાતાઓએ ભવિષ્યમાં વધુ ઝડપી મંજૂરી અને લોન વિતરણની અપેક્ષા વ્યક્ત કરી. આ આંકડા દર્શાવે છે કે પર્સનલ લોન હવે માત્ર કટોકટીની જરૂરિયાત માટે જ નહીં, પરંતુ ઘરની સજાવટ, ઇલેક્ટ્રોનિક્સ અને ફેશન જેવી આકાંક્ષાઓ પૂર્ણ કરવાના ખર્ચા માટે પણ લેવામાં આવી રહી છે.

આ સર્વેમાં અન્ય બે મહત્ત્વપૂર્ણ ટ્રેન્ડ પણ સામે આવ્યા છે. ૪૧% લોકોએ આ તહેવારોના સમયે પહેલીવાર પર્સનલ લોન લીધી, જે સૂચવે છે કે સામાન્ય લોકો પણ હવે આ વિકલ્પને સ્માર્ટ ફાઇનાન્સિયલ ટૂલ તરીકે અપનાવી રહ્યા છે. ગ્રાહકો હવે જવાબદારી સાથે લોન લઈ રહ્યા છે. ૬૦% લોકોએ ₹૫ લાખથી ઓછી રકમની લોન લીધી, જ્યારે ૪૨% એ ૫ વર્ષથી ઓછી અવધિ ની લોન પસંદ કરી. આ દર્શાવે છે કે ગ્રાહકો દેવાનો બોજ ન વધે તે માટે પોતાની ક્ષમતા અનુસાર લોન લઈ રહ્યા છે.

તહેવારોના ખર્ચમાં ઘરનું રેનોવેશન સૌથી આગળ

- તહેવારોમાં સૌથી વધુ લોન ઘરના નવીનીકરણ અને સજાવટ માટે લેવામાં આવી. 

- ૧૮% લોકોએ ઘરના રેનોવેશન અને ફર્નિશિંગ માટે લોન લીધી.

- ૧૫% લોકોએ ઇલેક્ટ્રોનિક્સ, એપ્લાયન્સિસ અને ગિફ્ટિંગ પર ખર્ચ કર્યો.

​​​​​​​- ૧૨% લોકોએ સોના-ચાંદી અથવા જ્વેલરી ખરીદવા માટે લોનનો ઉપયોગ કર્યો.

- અન્ય ખર્ચાઓમાં દેવું ચૂકવવા (Debt Consolidation - ૧૦%) અને ફેશન શોપિંગ (૧૦%) નો સમાવેશ થાય છે.