સિસ્ટાઇન ચેપલની ચીમનીમાંથી સફેદ ધુમાડો નીકળવાનું શરૂ થયાના લગભગ 70 મિનિટ પછી પોપ લીઓ સેન્ટ પીટર્સ બેસિલિકાની મધ્ય બાલ્કનીમાં દેખાયા. પછી એ સ્પષ્ટ થયું કે ૧૩૩ કાર્ડિનલ ઇલેક્ટર્સે કેથોલિક ચર્ચ માટે એક નવા નેતાની પસંદગી કરી છે. ફ્રાન્સના કાર્ડિનલ ડોમિનિક મેમ્બર્ટી દ્વારા નવા પોપ તરીકે રોબર્ટ પ્રિવોસ્ટના નામની જાહેરાત કરવામાં આવી હતી. તેમણે સેન્ટ પીટર્સ સ્ક્વેરમાં એકઠા થયેલા હજારો લોકોને કહ્યું, આપણી પાસે પોપ છે.

૬૯ વર્ષીય રોબર્ટ પ્રીવોસ્ટ મૂળ શિકાગોના છે. પ્રિવોસ્ટે તેમની કારકિર્દીનો મોટાભાગનો સમય પેરુમાં મિશનરી તરીકે વિતાવ્યો અને 2023 માં જ કાર્ડિનલ બન્યા. તેમણે ખૂબ ઓછા મીડિયા ઇન્ટરવ્યુ આપ્યા છે અને ભાગ્યે જ જાહેરમાં બોલે છે. પોપ ફ્રાન્સિસના મૃત્યુ પછી, લીઓ 267મા કેથોલિક પોપ બન્યા. પોપ ફ્રાન્સિસ પ્રથમ લેટિન અમેરિકન પોપ હતા અને તેમણે 12 વર્ષ સુધી કેથોલિક ચર્ચનું નેતૃત્વ કર્યું.

કેથોલિક પરંપરા મુજબ, પોપલ કોન્ક્લેવમાં નવા પોપની પસંદગી કરવામાં આવે છે. આમાં, વિશ્વભરના કાર્ડિનલ્સ પોપને ચૂંટે છે. કાર્ડિનલ્સ કેથોલિક ચર્ચના સર્વોચ્ચ કક્ષાના પાદરીઓ છે. કાર્ડિનલ્સ એ વિશ્વભરના બિશપ અને વેટિકન અધિકારીઓ છે જેમને પોપ દ્વારા વ્યક્તિગત રીતે પસંદ કરવામાં આવે છે. કોન્ક્લેવમાં આ કાર્ડિનલ્સ નવા પોપની પસંદગી કરવા માટે ઘણી બેઠકો યોજે છે.

નવા પોપ માટે મતદાન વેટિકન સિટીના સિસ્ટાઇન ચેપલમાં થાય છે. ૮૦ વર્ષથી ઓછી ઉંમરના કાર્ડિનલ્સને મતદાન કરવાનો અધિકાર છે. મતદાન અને બેઠકની સમગ્ર પ્રક્રિયા ગુપ્ત રાખવામાં આવે છે. આ સમયગાળા દરમિયાન, કાર્ડિનલ્સને બહારની દુનિયા સાથે કોઈ સંપર્ક કરવાની મંજૂરી નથી.