જામનગર રોડ પરના વિસ્તારમાં રહેતી વિધવા મહિલાની 15 વર્ષની દીકરીને પાડોશમાં રહેતો શખસ ભગાડી ગયા અંગે ગાંધીગ્રામ પોલીસ સ્ટેશનમાં ફરિયાદ નોંધાવવામાં આવી છે. પોલીસે અપહરણનો ગુનો નોંધી આરોપીને ઝડપી લેવા અને સગીરાને મુક્ત કરાવવા તપાસ હાથ ધરી છે.

શહેરની ભાગોળે જામનગર રોડ પાસેના વિસ્તારમાં રહેતા મૂળ યુપીના વતની વિધવા મહિલાએ ગાંધીગ્રામ પોલીસ સ્ટેશનમાં નોંધાવેલી ફરિયાદમાં આરોપી તરીકે પાડોશમાં રહેતા જયરાજ કાઠીનું નામ આપ્યું છે. મહિલાએ પોતાની ફરિયાદમાં જણાવ્યું હતું કે, તેમને સંતાનમાં ચાર પુત્રી અને એક પુત્ર છે. પતિનું કેન્સરની બીમારીથી નવેક વર્ષ પૂર્વે અવસાન થયું છે.

મંગળવારે રાત્રિના એકાદ વાગ્યા આસપાસ તેમની નાની દીકરીએ તેમને જગાડી કહ્યું હતું કે, બહેન ક્યાંક જતી રહી છે. જેથી મહિલાએ તેમની 15 વર્ષની દીકરી પાડોશમાં રહેતા જયરાજ કાઠી સાથે ભાગી ગઈ હોવાની શંકાએ તેના ઘરે જઈ તપાસ કરતા જયરાજ કાઠી પણ ઘરે ન હતો. અઠવાડિયા પૂર્વે મહિલાને જાણ થઈ હતી કે, તેમની દીકરીને પાડોશી જયરાજ કાઠી સાથે પ્રેમ સંબંધ છે જેથી આ બાબતે ઠપકો આપી સંબંધ મૂકી દેવા કહ્યું હતું. દરમિયાન રાત્રિના દીકરી લાપતા બનતા પાડોશી પણ ઘરે ન હોય અને તેના પરિવારજનો આ બાબતે અજાણ હોય દીકરીની આસપાસ શોધ કરી હતી. પરંતુ તેમ છતાં તેનો કોઈ પતો ન લાગતા અંતે ગાંધીગ્રામ પોલીસમાં આ મામલે ફરિયાદ નોંધાવતા પોલીસે અપહરણનો ગુનો નોંધી સગીરાને ભગાડી જનાર જયરાજ કાઠીને શોધી કાઢવા અને સગીરાને મુક્ત કરાવવા તપાસ હાથ ધરી છે. બનાવ અંગે વધુ તપાસ પીઆઇ વી.આર.વસાવા ચલાવી રહ્યા છે.