કુદરતના કહેરથી દેશભરમાં ભારે તારાજી સર્જાઈ છે. દક્ષિણથી લઈને ઉત્તર ભારતમાં મોટી સંખ્યામાં લોકો વરસાદ અને ભૂસ્ખલનથી પ્રભાવિત થયા છે અને ઘણા લોકોએ જીવ પણ ગુમાવ્યા છે. જ્યારે વાયનાડ દુર્ઘટનામાં મૃત્યુઆંક સતત વધી રહ્યો છે, ત્યારે હિમાચલ અને ઉત્તરાખંડ જેવા પર્વતીય રાજ્યોમાં સ્થિતિ ગંભીર છે.

હિમાચલ પ્રદેશ અને ઉત્તરાખંડના પર્વતીય રાજ્યોમાં વાદળ ફાટવા અને પૂરને કારણે આ દુર્ઘટનામાં ભારે નુકસાન થયું. હિમાચલ પ્રદેશમાં હજુ પણ 47 લોકો ગુમ છે. શુક્રવારે બે બાળકોના મૃતદેહ મળી આવ્યા, જે બાદ મૃત્યુઆંક સાત થયો હતો. કુલ્લુ, શિમલા અને મંડી જિલ્લામાં ક્ષતિગ્રસ્ત રસ્તાઓને કારણે મશીનરી પહોંચી શકી નથી.

સ્થાનિક લોકો બચાવ કાર્યમાં રોકાયેલા NDRF, SDRF, પોલીસ અને હોમગાર્ડની મદદ કરી રહ્યા છે. ગુમ થયેલા લોકોના પરિવારજનો તેમની રાહ જોઈ રહ્યા છે. કેન્દ્ર સરકાર દ્વારા મોકલવામાં આવેલ ચિનૂક અને MI-17 પણ ઉત્તરાખંડમાં બચાવ કામગીરીમાં જોડાયા છે. કેન્દ્રીય ગૃહ પ્રધાન અમિત શાહે મુખ્ય પ્રધાન પુષ્કર સિંહ ધામી પાસેથી ફોન પર રાહત અને બચાવ કામગીરીની માહિતી લીધી હતી.

કેદારનાથમાં 700થી વધુ શ્રદ્ધાળુઓ ફસાયા

ચિંતાની વાત એ છે કે કેદારનાથમાં ભૂસ્ખલન બાદ ત્રીજા દિવસે પણ 150 લોકો તેમના સંબંધીઓનો સંપર્ક કરી શક્યા નથી. શુક્રવારે અન્ય 2744 યાત્રાળુઓને બહાર કાઢવામાં આવ્યા હતા, પરંતુ 700 થી વધુ લોકો હજુ પણ ધામમાં હાજર છે. હિમાચલમાં, હવામાન વિભાગે લાહૌલ સ્પીતિ, કિન્નૌર અને સિરમૌર સિવાયના બાકીના જિલ્લાઓમાં 3 અને 4 ઓગસ્ટ અને પછી 7 અને 8 ઓગસ્ટે વાવાઝોડા સાથે ભારે વરસાદની આગાહી કરી છે.