અજિત પવાર અને શરદ પવાર જૂથ વચ્ચે હવે પોસ્ટર વોર શરૂ થઈ ગઈ છે. દિલ્હીમાં NCP ચીફ શરદ પવારના ઘરની બહાર અજિત પવાર વિરુદ્ધ ફિલ્મ 'બાહુબલી'ના પોસ્ટર લગાવવામાં આવ્યા છે. આ પોસ્ટરોમાં અજીતને 'દેશદ્રોહી' ગણાવવામાં આવ્યો છે. આટલું જ નહીં, પોસ્ટરમાં અજીત બાહુબલી ફિલ્મના કટપ્પાની જેમ શરદ પવારને પાછળથી છરા મારતા જોવા મળે છે.

વાસ્તવમાં, અજિત પવારે 2 જુલાઈના રોજ કાકા શરદ પવાર સામે બળવો કર્યો અને મહારાષ્ટ્રની એકનાથ શિંદે સરકારમાં જોડાયા. તેમણે મહારાષ્ટ્રના ડેપ્યુટી સીએમ તરીકે શપથ લીધા. તેમની સાથે NCPના 8 ધારાસભ્યોએ પણ શિંદે સરકારમાં મંત્રી તરીકે શપથ લીધા હતા. આ પછી NCP શરદ પવાર અને અજિત પવાર જૂથમાં વહેંચાઈ ગઈ. બુધવારે મળેલી બેઠકમાં બંને જૂથોએ શક્તિ પ્રદર્શન પણ કર્યું હતું.

આ પોસ્ટરો રાષ્ટ્રવાદી વિદ્યાર્થી કોંગ્રેસ વતી શરદ પવારના દિલ્હીના 6 જનપથ રોડ સ્થિત ઘર પર લગાવવામાં આવ્યા છે. આ પોસ્ટરમાં અજીતને કટપ્પાની જગ્યાએ અને શરદ પવારને બાહુબલીની જગ્યાએ બતાવવામાં આવ્યા છે. પોસ્ટરમાં અજીત શરદ પવાર પર પાછળથી હુમલો કરતા જોવા મળે છે.

દિલ્હીના ફિરોઝશાહ રોડ પર NCP કાર્યાલયમાં જૂના પોસ્ટરો હટાવી નવા પોસ્ટરો લગાવવામાં આવ્યા છે. જૂના પોસ્ટરમાં શરદ પવારની સાથે અજિત પવાર અને પ્રફુલ્લ પટેલ ક્યાંક જોવા મળી રહ્યા છે. આ પોસ્ટરો હટાવી દેવામાં આવ્યા છે. જ્યારે નવા પોસ્ટરમાં શરદ પવાર અને સુપ્રિયા સુલે જોવા મળી રહ્યા છે.

  NCP ચીફ શરદ પવારે આજે દિલ્હીમાં રાષ્ટ્રીય કાર્યકારિણીની બેઠક બોલાવી છે. આ બેઠક દિલ્હીમાં શરદ પવારના નિવાસસ્થાને યોજાશે. શરદ પવાર અને સુપ્રિયા સુલે બેઠક માટે દિલ્હી જવા રવાના થઈ ગયા છે. NCP પર દાવાની લડાઈ ચૂંટણી પંચ સુધી પહોંચી છે. બંને પક્ષોએ પક્ષ અને પ્રતીક પરના દાવાને લઈને ચૂંટણી પંચનો સંપર્ક કર્યો હતો. અજિત જૂથે ચૂંટણી પંચમાં દાખલ કરેલી અરજીમાં અજિત પવારને NCPના અસલી વડા ગણાવ્યા છે.

અજિત પવારે એનસીપીનો દાવો કરતા ચૂંટણી પંચમાં સોગંદનામું દાખલ કર્યું છે, જેમાં કહેવામાં આવ્યું છે કે, 30 જૂન, 2023ના રોજ પાર્ટીના વિધાન અને સંગઠનાત્મક પાંખના સભ્યોએ પ્રચંડ બહુમતી સાથે ઠરાવ પસાર કર્યો અને અજિત પવારને NCPના વડા તરીકે ચૂંટ્યા. . અજિત પવારની આગેવાની હેઠળના જૂથ દ્વારા બુધવારે જારી કરાયેલા નિવેદનમાં એમ પણ કહેવામાં આવ્યું છે કે શરદ પવારને રાજીનામું આપનાર પ્રફુલ્લ પટેલ એનસીપીના કાર્યકારી અધ્યક્ષ તરીકે ચાલુ રહેશે.