મૂડીઝ રેટિંગ્સે ગઈકાલે જણાવ્યું હતું કે ભારતીય ચલણ છેલ્લા બે વર્ષમાં લગભગ 5 ટકા અને છેલ્લા પાંચ વર્ષમાં 20 ટકા ઘટીને દક્ષિણ અને દક્ષિણપૂર્વ એશિયામાં સૌથી ખરાબ પ્રદર્શન કરતા ચલણોમાંનું એક બની ગયુ છે. અમેરિકન ડોલર સામે રૂપિયાના મૂલ્યમાં સતત ઘટાડો થઈ રહ્યો છે. તાજેતરમાં રૂપિયો ઘટીને 86.70 રૂપિયા પ્રતિ ડોલર થયો હતો. આર્થિક જગતમાં આ અંગે ઘણી ચિંતા છે. રેટિંગ એજન્સીનું આ મૂલ્યાંકન ઘણા ક્વાર્ટરમાં પ્રવર્તતી ધારણાથી વિપરીત છે કે ડોલરની મજબૂતાઈ વચ્ચે ભારતીય ચલણનું પ્રદર્શન અન્ય ચલણો કરતાં ઘણું સારું રહ્યું છે.
મૂડીઝે રૂપિયાના ઘટાડાની અસરને સમજવા માટે 23 ભારતીય કંપનીઓનું મૂલ્યાંકન કર્યું છે. આ આધારે મૂડીઝે શોધી કાઢ્યું કે આમાંથી માત્ર છ કંપ્નીઓ ડોલરના મજબૂતાઈથી પ્રભાવિત થઈ રહી છે. જોકે, મૂડીઝે તેના અહેવાલમાં જણાવ્યું હતું કે આ કંપ્નીઓમાં એવા પરિબળો પણ છે જે અસર ઘટાડી શકે છે. મૂડીઝના મૂલ્યાંકનમાં સમાવિષ્ટ આ કંપ્નીઓમાં ભારત પેટ્રોલિયમ કોર્પોરેશન (બીપીસીએલ), હિન્દુસ્તાન પેટ્રોલિયમ કોર્પોરેશન (એચપીસીએલ), ઇન્ડિયન ઓઇલ કોર્પોરેશન (આઈઓસી), અલ્ટ્રાટેક સિમેન્ટ, ભારતી એરટેલ અને એએનઆઈ ટેક્નોલોજીસ પ્રાઇવેટ લિમિટેડનો સમાવેશ થાય છે. આ સહિત મૂડીઝે કુલ 23 કંપ્નીઓનું મૂલ્યાંકન કર્યું છે.
મૂડીઝે ’દક્ષિણ અને દક્ષિણપૂર્વ એશિયન ઇમર્જિંગ માર્કેટ્સ કંપ્નીઓ’ પરના તેના અહેવાલમાં જણાવ્યું છે કે છેલ્લા બે વર્ષમાં રૂપિયામાં માત્ર 5 ટકાનો ઘટાડો થયો છે પરંતુ જાન્યુઆરી 2020 થી અત્યાર સુધીમાં તેમાં 20 ટકાથી વધુનો ઘટાડો થયો છે. આમ, તે દક્ષિણ અને દક્ષિણ-પૂર્વ એશિયામાં સૌથી નબળા પ્રદર્શન કરતા ચલણોમાંથી એક બની ગયું છે.