પશ્ચિમ બંગાળમાં એક તાલીમાર્થી મહિલા ડૉક્ટરની જઘન્ય હત્યા બાદ સર્વોચ્ચ અદાલતે હોસ્પિટલો અને મેડિકલ કોલેજોમાં મહિલાઓની સુરક્ષા માટે ટાસ્ક ફોર્સ બનાવવાના આદેશો જારી કર્યા છે, પરંતુ સમાજમાં મહિલાઓ ઘરમાં પણ સુરક્ષિત નથી. ગાઝિયાબાદમાં એક કિસ્સો પ્રકાશમાં આવ્યો છે જેમાં એક યુવકે તેની 22 વર્ષની મિત્ર (છોકરી)ને દાંત વડે કરડીને ખરાબ રીતે ઘાયલ કરી દીધી છે. યુવતીના શરીરના અલગ-અલગ ભાગો પર કરડવાના 50થી વધુ ઘા છે.

આવી ક્રૂરતાનો આ પહેલો કિસ્સો

સુત્રો દ્વારા જાણવા મળ્યું છે કે, યુવતીના પગ, બંને હાથ, છાતી, ગરદન, બંને ગાલ, હોઠ, નિતંબ, કપાળ અને આંખો પર કરડવાના ગંભીર ઘા છે. મામલો કવિનગર વિસ્તારની ચિરંજીવ વિહાર કોલોનીનો છે.

આ સંદર્ભે પોલીસે શુક્રવારે સંજય નગરની જોઈન્ટ હોસ્પિટલમાં યુવતીની મેડિકલ તપાસ કરાવી હતી. સૂત્રોના જણાવ્યા અનુસાર, કરડવાના મોટાભાગના ઘા ગાલ પર છે. જિલ્લામાં આવી બર્બરતાનો આ પ્રથમ કિસ્સો છે.

પોલીસ વિભાગમાં ખળભળાટ મચ્યો

મિત્રો અને પતિ દ્વારા લાકડી, છરી અને સળિયા વડે મહિલાઓને માર માર્યો હોવાના અનેક કિસ્સા પ્રકાશમાં આવ્યા છે, પરંતુ યુવતીને દાંત કરડીને ઇજા પહોંચાડી હોવાના કિસ્સાથી પોલીસ વિભાગમાં ખળભળાટ મચી ગયો છે.

યુવકના પિતા પ્રતિષ્ઠિત હોવાની ચર્ચા છે. પોલીસ આ મામલે તાત્કાલિક કાર્યવાહી કરવાનું ટાળી રહી છે. મેડિકલ ડોક્ટરોએ યુવતીના શરીર પરના દરેક કરડવાના ઘાનું સંપૂર્ણ વર્ણન કરી પોલીસને મોકલી આપ્યું છે.

હવે જોવાનું એ રહે છે કે, આ મામલે કયા સ્તરે અને ક્યારે કાર્યવાહી થશે. પોલીસ વિભાગની મહિલા પોલીસ કર્મીઓએ દિવસભર આ ઘટનાને વખોડી કાઢી હતી. આરોગ્ય કર્મચારીઓએ તેને સમાજ માટે ચિંતાનો વિષય ગણાવ્યો છે.