રાજકોટ સહિત રાજ્યના અનેક વિસ્તારોમાં આજે સતત બીજા દિવસે ઝાકળ જોવા મળી હતી. સવારે વાતાવરણમાં ભેજનું પ્રમાણ વધી જવાના કારણે ખુશનુંમા વાતાવરણનો અનુભવ લોકોએ કર્યો હતો. હવામાન ખાતાના જણાવ્યા મુજબ એકધારા વધી રહેલા મહત્તમ તાપમાનના પારાને પણ બ્રેક લાગી છે અને અનેક જગ્યાએ બે થી ત્રણ ડિગ્રી કેટલો ઘટાડો ગરમીમાં થયો છે.

રાજકોટમાં આજે સવારે વાતાવરણમાં ભેજનું પ્રમાણ 96% નોંધાયું હતું અને તેના કારણે રસ્તાઓ, વાહનો અને વૃક્ષો પર ભીનાશ જોવા મળી હતી. રાજકોટની માફક પોરબંદરમાં પણ સવારે ભેજનું પ્રમાણ 96% રહ્યું હતું. ભુજમાં 87 દ્વારકામાં 91 કંડલામાં 81 નલિયામાં 85 ઓખામાં 88 અને વેરાવળમાં 77% ભેજ આજે સવારે નોંધાયો છે.

રાજસ્થાનમાં સાયક્લોનિક સર્ક્યુલેશન જોવા મળ્યું છે અને તેનો છેડો અરબી સમુદ્ર સુધી હોવાથી ગઈ કાલ સાંજથી જ દરિયાકાંઠાના વિસ્તારોમાં ભેજનું પ્રમાણ વધી ગયું હતું. ગઈકાલે સાંજે વેરાવળમાં 80 દમણમાં 60 દ્વારકામાં 84 કંડલામાં 69 ઓખામાં 74 અને પોરબંદરમાં 69% ભેજ નોંધાયો હતો. સામાન્ય રીતે ગરમી હોય ત્યારે સાંજે ભેજનું પ્રમાણ 25% આસપાસ હોય છે.

38 ડિગ્રીને મહત્તમ તાપમાન પાર કરી ગયા પછી તે ઘટીને 35 થી 36 ડિગ્રીની રેન્જમાં આવી ગયું છે. ભુજમાં 33.7 નલિયામાં 30 અમરેલીમાં 36 ભાવનગરમાં 33.9 દ્વારકામાં 28.6 ઓખામાં 29.5 પોરબંદરમાં 31.2 રાજકોટમાં 36.7 વેરાવળમાં 35.6 સુરેન્દ્રનગરમાં 35.4 મહુવામાં 33.8 કેશોદમાં 35.5 અમદાવાદમાં 36.6 ડીસામાં 34.4 ગાંધીનગરમાં 36.2 વલ્લભ વિદ્યાનગરમાં 34.7 વડોદરામાં 35.8 અને સુરતમાં 36 ડિગ્રી મહત્તમ તાપમાન શુક્રવારે નોંધાયું છે.