લોધીકા તાલુકાના એક ગામમાં રહેતા યુવાને એ ડિવિઝન પોલીસ સ્ટેશનમાં નોંધાવેલી ફરિયાદમાં જણાવ્યું હતું કે, રાજકોટમાં માલવીયા ચોક પાસેના વિસ્તારમાં આવેલી શાળામાં તેની 14 વર્ષની દીકરી ધો.૯ માં અભ્યાસ કરે છે ગઈ તા. 7/4 ના સવારના 9:00 વાગ્યે યુવાન કામ પર હતો ત્યારે દીકરીના શિક્ષકનો ફોન આવ્યો હતો અને કહ્યું હતું કે, આજે ધોરણ ૯ ની પરીક્ષા હોય છતાં કેમ તમારી દીકરીને મોકલી નથી તેને પરીક્ષા દેવા મોકલો જેથી ફરિયાદીએ પાડોશમાં રહેતા મહિલાને ફોન કરી કહ્યું હતું કે, મારા ઘરે જઈ દીકરી સાથે વાત કરાવો બાદમાં તેમણે ઘરે જઈ દીકરી સાથે વાત કરાવતા દીકરીને કહ્યું હતું કે, શિક્ષકનો ફોન આવ્યો છે અને તારે પરીક્ષા હોય જેથી આજે તારે સ્કૂલે વહેલું જવાનું છે તેવી વાત કરી હતી.

ત્યારબાદ દસેક વાગ્યા આસપાસ દીકરી ઘરેથી સ્કૂલ જોવા માટે નીકળી હતી. બપોરના બાર વાગ્યે યુવાન ઘરે આવતા દીકરી ઘરે આવી ન હોય એકાદ વાગ્યા આસપાસ શિક્ષકને ફોન કરી પૂછતા કહ્યું હતું કે, તે શાળાએ આવી પરીક્ષા આપી 11:30 વાગ્યે અહીંથી નીકળી ગઈ હતી. બાદમાં પરિવાર દીકરીની શોધખોળ શરૂ કરી હતી. સગા સંબંધીઓને પૃચ્છા કરી હતી તેમજ એસટી બસ સ્ટેન્ડ આસપાસ પણ તપાસ કરી હતી. તેમછતાં દીકરીનો કોઈ પતો ન લાગતા અંતે આ મામલે પોલીસને જાણ કરતા એ ડિવિઝન પોલીસે અપહરણનો ગુનો નોંધી સગીરાના સગડ મેળવવા શોધખોળ શરૂ કરી છે.