રાજકોટના ભુપગઢમાં રહેતા અને મજૂરી કામ કરતા રવજીભાઈ નારણભાઇ રાઠોડ (ઉ.વ.50) નામના આધેડ રાત્રે ઘર પાસે હતા ત્યારે કૌટુંબિક ભાણેજ અલ્પેશ કરશનભાઇ બથવાર, કૌટુંબિક ભત્રીજા અલ્પેશ મનજીભાઇ રાઠોડ, અરુણ જેન્તીભાઇ રાઠોડએ ધોકા વડે હુમલો કરી ઢીકાપાટુનો મારમારતા ઇજા થવાથી સારવાર માટે સિવિલ હોસ્પિટલમાં ખસેડવામાં આવ્યા હતા. બનાવ અંગે હોસ્પિટલ ચોકીના સ્ટાફે આજીડેમ પોલીસને જાણ કરતા પોલીસે હોસ્પિટલ પહોંચી રવજીભાઈની ફરિયાદ પરથી ત્રણેય સામે ગુનો નોંધ્યો છે.

ફરિયાદમાં જણાવ્યું છે કે, ગઈકાલે રાત્રીના નવેક વાગ્યે હું મારા ઘર પાસે હતો ત્યારે કૌટુંબિક ભાણેજ અલ્પેશ બથવાર અને કૌટુંબિક ભત્રીજા અલ્પેશ મનજીભાઇ રાઠોડ, અરુણ જયંતીભાઈ રાઠોડ ત્રણેય મારા સગા ભત્રીજા રાકેશ અને રોહિત સાથે બોલાચાલી કરી ઝગડો કરતા હોવાથી આ લોકો ઝગડો ન કરે તે સારું હું છોડાવવા વચ્ચે પડતા ત્રણેય મને ગાળો આપવા લાગ્યા હતા અને અલ્પેશના હાથમાં ધોકો હોય જે પગે-માથામાં માર્યો હતો અને અલ્પેશ અને અરુણએ ઢીકાપાટુનો મારમાર્યો હતો. દેકારો થતા ત્રણેય ભાગી ગયા હતા અને મને પરિવારજનોએ 108 મારફતે સિવિલ હોસ્પિટલમાં ખસેડવામાં આવ્યો હતો. બનાવ અંગે પોલીસે આગળની તપાસ હાથ ધરી છે.