રાજકોટ ગ્રામ્ય પોલીસ મંડળ દ્વારા દારૂ અને જુગારની પ્રવૃત્તિઓ નાબૂદ કરવા માટે ચલાવવામાં આવી રહેલી કડક ઝુંબેશ અંતર્ગત રાજકોટ રેન્જ પોલીસની ટીમે એક મોટી સફળતા મેળવી છે. પોલીસે જેતપુર તાલુકાના ખારચીયા ગામ જવાના રસ્તા પરથી એક ઇકોસ્પોર્ટસ કારમાંથી ૫૦૦ લીટર દેશી દારૂ ઝડપી પાડીને એક આરોપીની ધરપકડ કરી છે, જ્યારે દારૂ મંગાવનાર અને મોકલનાર અન્ય બે શખ્સોને પકડી પાડવા ચક્રો ગતિમાન કર્યા છે.

બાતમીના આધારે વોચ ગોઠવી ઓપરેશન પાર પાડ્યું

રાજકોટ રેન્જના નાયબ પોલીસ મહાનિરીક્ષક (DIG) નિર્લિપ્ત રાય (IPS) અને પોલીસ ઇન્સપેક્ટર અપૂર્વ પટેલના માર્ગદર્શન હેઠળ પોલીસની ટીમ કાર્યરત હતી. આ દરમિયાન પોલીસ સ્ટાફના દિવ્યેશભાઇ સુવા, વકારભાઇ આરબ, શિવરાજસિહ ઝાલા, નિકુલભાઇ પંપાણીયા અને ડ્રાઇવર ગોવિંદભાઇ ધાંધળને ચોક્કસ બાતમી મળી હતી કે જેતપુર-બગસરા રોડ પરથી દારૂનો મોટો જથ્થો પસાર થવાનો છે.

બાતમીના આધારે પોલીસે જેતપુર તાલુકા પોલીસ સ્ટેશનની હદમાં આવેલા ખારચીયા ગામના રસ્તા પર, રણુજા મંદિર નજીક મામાદેવના મંદિર પાસે વોચ ગોઠવી હતી. ત્યાંથી પસાર થઈ રહેલી શંકાસ્પદ ઇકોસ્પોર્ટસ કારને રોકીને જ્યારે તલાશી લેવામાં આવી, ત્યારે તેમાંથી ૫૦૦ લીટર દેશી દારૂ મળી આવ્યો હતો.

એક આરોપીની ધરપકડ, બે વોન્ટેડ

પોલીસે કાર ચલાવી રહેલા આરોપી દિપક ઉર્ફે મોતીયો ગુણવંતરાય વોરા (રહે. રામપરા, તા. ધોરાજી, મૂળ રહે. જેતપુર)ની ઘટનાસ્થળેથી જ ધરપકડ કરી લીધી હતી. પોલીસ પૂછપરછમાં સામે આવ્યું છે કે દારૂનો આ જથ્થો ધારી-બગસરાના દિલુભાઇ બોરીચાએ આપ્યો હતો અને જેતપુરના કિશન ડાયાભાઇ રાઠોડ નામના શખ્સે મંગાવ્યો હતો. પોલીસે આ બંને ફરાર આરોપીઓ વિરુદ્ધ પણ ગુનો નોંધી તેમની શોધખોળ શરૂ કરી છે.

કુલ રૂ. ૪,૦૦,૫૦૦નો મુદ્દામાલ જપ્ત

પોલીસે આ સફળ દરોડા દરમિયાન નીચે મુજબનો મુદ્દામાલ જપ્ત કર્યો છે:

૫૦૦ લીટર દેશી દારૂ

એક મોબાઇલ ફોન

ઇકોસ્પોર્ટસ કાર

આ તમામ વસ્તુઓ મળીને પોલીસે કુલ રૂપિયા ૪,૦૦,૫૦૦/- નો મુદ્દામાલ કબજે કર્યો છે અને જેતપુર તાલુકા પોલીસ સ્ટેશનમાં પ્રોહિબિશન એક્ટ હેઠળ કાયદેસરની ફરિયાદ દાખલ કરાવી આગળની તપાસ હાથ ધરી છે. આ સફળ કામગીરી બદલ ઉચ્ચ અધિકારીઓએ રેન્જ પોલીસની ટીમને બિરદાવી છે.