દર વર્ષની જેમ આ વર્ષે પણ ગણેશ ચતુર્થી ભારતભરમાં ધામધૂમથી ઉજવવામાં આવશે. આ દિવસને ખાસ બનાવવા માટે ભગવાન ગણેશના મનપસંદ મોદકને ઓછા સમયમાં ઘરે બનાવી શકો છો. એવું માનવામાં આવે છે કે મોદક ચઢાવનારા ભક્તો પર ગણપતિની અપાર કૃપા હોય છે. આ ગણેશ ચતુર્થીએ બજારમાંથી ખરીદવાને બદલે ઘરે જ બનાવો સ્વાદિષ્ટ મોદક.

ચોકલેટ મોદક બનાવવા માટેની સામગ્રી

• કન્ડેન્સ્ડ દૂધ 50 ગ્રામ
• ડાર્ક ચોકલેટ 250 ગ્રામ
• પિસ્તા 2 ચમચી
• કાજુ 3 ચમચી (ઝીણા સમારેલ)
• બદામ 3 ચમચી (ઝીણી સમારેલી)
• નારિયેળના ટુકડા 100 ગ્રામ
• ઘી 1 ચમચી

બનાવવાની રીત

સૌપ્રથમ ડાર્ક ચોકલેટ લો અને તેને ઓગાળી લો. ચોકલેટ ઓગાળવા માટે એક ફ્રાય પેનમાં પાણી નાખી ઉપર એક બાઉલ મુકો અને ચોકલેટ ઓગાળી લો.  હવે એક કડાઈમાં ઘી મુકી થોડીવાર માટે તેમાં કાજુ, બદામ, પિસ્તા અને નાળિયેર નાખીને ફ્રાય કરો. પછી તેમાં કન્ડેન્સ્ડ મિલ્ક નાખીને તૈયાર કરો. મિશ્રણ તૈયાર થઈ જાય પછી તેમાં ઓગળેલી ચોકલેટ ઉમેરો અને થોડી વાર ઠંડુ થવા દો અને છેલ્લે મોલ્ડમાં નાખીને મોદકનો આકાર આપો. આ રીતે ચોકલેટ મોદક તૈયાર કરી શકો છો.

પનીર મોદક બનાવવા માટેની સામગ્રી

• પનીર 1 કપ હોમમેઇડ પનીર
• ખાંડ 1/2 કપ દળેલી ખાંડ
• કાજુ બદામ પાવડર 1/4 કપ
• દેશી ઘી 2 ચમચી
• એલચી પાવડર 1
• કેસર 4-5 તાંતણા

બનાવવાની રીત:

એક કડાઈમાં ઘી ગરમ કરી તેમાં પનીર નાખીને સારી રીતે તળી લો. હવે તેમાં ખાંડ નાખીને મિક્સ કરો, પછી તેમાં કાજુ, બદામ અને એલચીનો ભૂકો નાખીને બરાબર મિક્ષ કરી લો. જ્યારે મિશ્રણ ઠંડુ થાય ત્યારે તેને મોલ્ડમાં નાંખી દો. આ રીતે ઘરે પનીર મોદક બનાવી શકો છો.