T20 વર્લ્ડ કપ 2024માં રવિવારે ભારતીય ટીમ અને પાકિસ્તાન વચ્ચે ખૂબ જ રોમાંચક મેચ રમાઈ હતી. આ મેચમાં રોહિત શર્માની કેપ્ટન્સીમાં ભારતીય ટીમે 6 રનથી મજબૂત વિજય નોંધાવ્યો હતો. પરંતુ આ મેચ દરમિયાન ભારતીય ક્રિકેટ માટે એક ખરાબ સમાચાર પણ સામે આવ્યા છે.

આ મેચ જોવા અમેરિકા આવેલા મુંબઈ ક્રિકેટ એસોસિએશન (MCA)ના પ્રમુખ અમોલ કાલેનું હાર્ટ એટેકથી નિધન થયું હતું. તે સ્ટેડિયમમાં બેસીને આ મેચ જોઈ રહ્યો હતો. મેચ બાદ તેની તબિયત લથડી હતી અને હાર્ટ એટેકથી તેનું મૃત્યુ થયું હતું.

અમોલ કાલે દેવેન્દ્ર ફડણવીસના નજીકના ગણાતા હતા. અમોલ એમસીએ અધિકારીઓ સાથે ભારત-પાકિસ્તાન મેચ જોવા માટે ન્યૂયોર્ક પહોંચ્યો હતો. આ શાનદાર મેચ નાસાઉ કાઉન્ટી ઈન્ટરનેશનલ ક્રિકેટ સ્ટેડિયમમાં રમાઈ હતી.