અમરેલીના પાણીયા ગામે એક હૃદયદ્રાવક ઘટના બની છે. 7 વર્ષના બાળક પર સિંહે હુમલો કર્યાના સમાચાર સામે આવ્યા હતા. આ ઘટનાથી સમગ્ર ગામમાં શોકનો માહોલ છવાઈ ગયો છે.

બગસરા તાલુકાના પાણીયા ગામે રાહુલભાઈ નારુભાઈ બારૈયા નામનો 7 વર્ષનો બાળક આજે સવારે 8:30 કલાકે નદીમાં પાણી ભરવા જઈ રહ્યો હતો, ત્યારે સિંહે તેના પર હુમલો કર્યો હતો. સિંહે બાળકને ગંભીર રીતે ઘાયલ કર્યો, જેના કારણે તેનું ઘટનાસ્થળે જ મોત નીપજ્યું હતું.

બાળકના મૃતદેહને પોસ્ટમોર્ટમ માટે અમરેલી સિવિલ હોસ્પિટલ ખાતે ખસેડવામાં આવ્યો છે. આ ઘટનાથી પરિવારમાં ભારે દુઃખ અને આઘાત લાગ્યો છે.

સ્થાનિકોમાં ભયનો માહોલ

આ ઘટના બાદ સ્થાનિકોમાં ભયનો માહોલ ફેલાઈ ગયો છે. લોકો હવે એકલા બહાર નીકળતા ડરી રહ્યા છે. સિંહના હુમલાની ઘટનાઓએ વન્યજીવો અને માનવ વચ્ચેના સંઘર્ષને ફરી એકવાર પ્રકાશમાં લાવ્યો છે.