ભારતીય સેનાએ પાકિસ્તાનમાં આતંકવાદીઓના ઠેકાણાઓ પર કાર્યવાહી કરી છે. સેનાએ 9 આતંકવાદી ઠેકાણાઓનો નાશ કર્યો છે. હવે આ કાર્યવાહી બાદ, તમામ અર્ધલશ્કરી દળોની રજાઓ રદ કરવામાં આવી છે. ગૃહ મંત્રાલયના સૂત્રો તરફથી આ મોટા સમાચાર આવી રહ્યા છે. મળતી માહિતી મુજબ, ગૃહમંત્રી અમિત શાહે તમામ અર્ધલશ્કરી દળોના ડીજીઓને સરહદ પર સંપૂર્ણપણે સતર્ક રહેવા સૂચના આપી છે. આ ઉપરાંત આંતરરાષ્ટ્રીય સરહદ પર હાઇ એલર્ટ જારી કરવામાં આવ્યું છે. હાલમાં, દેશભરમાં મોક ડ્રીલની તૈયારીઓ પણ ચાલી રહી છે.

આ ઉપરાંત, ઓપરેશન સિંદૂરની ઘટના બાદ સમગ્ર ઉત્તર પ્રદેશમાં રેડ એલર્ટ જાહેર કરવામાં આવ્યું છે. યુપીના ડીજીપી પ્રશાંત કુમારે આ માહિતી આપી છે. આ ઉપરાંત, સુરક્ષાને ધ્યાનમાં રાખીને, તેમણે યુપી પોલીસ સહિત અન્ય સંરક્ષણ એકમોને સુરક્ષા મજબૂત બનાવવા સૂચના આપી છે. આ હુમલા પછી, પાકિસ્તાને પણ સ્વીકાર્યું કે ભારતે આ હુમલો કર્યો હતો. ભારતના હુમલા બાદ પાકિસ્તાનના પીએમ શાહબાઝ શરીફે રાત્રે એક કટોકટી બેઠક બોલાવી હતી. તેમણે એમ પણ કહ્યું કે પાકિસ્તાન ભારતના હુમલાનો જવાબ આપશે.

ઉલ્લેખનીય છે કે ભારતીય સેનાએ મોડી રાત્રે લગભગ 1.05 વાગ્યાથી 1.30 વાગ્યા સુધી ઓપરેશન સિંદૂર ચલાવ્યું હતું. આ અંતર્ગત લાહોરમાં આતંકવાદી હાફિઝ સઈદ અને બહાવલપુરમાં આતંકવાદી મસૂદ અઝહરના ઘણા ઠેકાણાઓનો નાશ કરવામાં આવ્યો. ભારતીય સેનાએ પીઓકેમાં મુઝફ્ફરાબાદ, ધમોલ, કોટલી અને બાગ ઠેકાણાઓ પર પણ હુમલો કર્યો. ભારતીય સેના દ્વારા કરવામાં આવેલી સ્ટ્રાઈકમાં લશ્કર અને જૈશના લગભગ 30 આતંકવાદીઓ માર્યા ગયા હતા. જયારે પીએમ મોદી ઓપરેશન સિંદૂર પર સતત નજર રાખી રહ્યા હતા. પીએમ મોદી શરૂઆતથી જ આખી રાત ઓપરેશનનું નિરીક્ષણ કરતા રહ્યા. આ દરમિયાન, એનએસએ અજિત ડોભાલે પણ પીએમ મોદીને ઓપરેશન સંબંધિત માહિતી સતત આપી.