​​​​​​​મહારાષ્ટ્રના ગ્રામીણ પુણે સ્થિત લવાસામાં ભૂસ્ખલનની એક મોટી ઘટના બની છે. આ ઘટના પુણેના મુલશી તાલુકાની છે. જ્યાં NDRFની ટીમ પહોંચી ગઈ છે. અત્યાર સુધીની પ્રાથમિક માહિતી મુજબ બે-ત્રણ લોકોના દટાયા હોવાની આશંકા છે. કહેવામાં આવી રહ્યું છે કે બે બંગલા પર એક મોટો પથ્થર પડ્યો છે.

આ સમયે પુણેમાં ભારે વરસાદ પડી રહ્યો છે. વરસાદના કારણે પુણે શહેરમાં પણ પાણી ભરાઈ જવાની સ્થિતિ છે. IMD એ પણ આજે અહીં ઓરેન્જ એલર્ટ જાહેર કર્યું છે. મુલશી તાલુકામાં બનેલી ઘટનાની માહિતી મળતાં જ NDRFની ટીમ ઘટના સ્થળે પહોંચી હતી. ભૂસ્ખલનને કારણે કેટલીક જગ્યાએ રસ્તા પર તિરાડો પડી ગઈ છે.

વરસાદના કારણે પુણે શહેરમાં ઘણી જગ્યાએ લોકો અટવાઈ ગયા છે. જિલ્લા ફાયર ટીમે અત્યાર સુધીમાં 70 લોકોને બચાવીને સલામત સ્થળે પહોંચાડ્યા છે. રસ્તાઓ પર એટલું પાણી જમા થઈ ગયું છે કે વાહનો ડૂબી ગયા છે.

સીએમ શિંદે પૂણેની સ્થિતિ પર નજર રાખી રહ્યા છે

રાજ્યના સીએમ એકનાથ શિંદે પણ પુણેમાં વરસાદને કારણે સર્જાયેલી સ્થિતિ પર નજર રાખી રહ્યા છે. તેમણે કહ્યું કે જરૂર પડશે તો વરસાદથી પ્રભાવિત લોકોને એરલિફ્ટ કરવામાં આવશે. રાજ્યમાં વરસાદને કારણે અત્યાર સુધીમાં ચાર લોકોના મોત થયા છે અને અનેક ઘરોમાં પાણી ભરાઈ ગયા છે. સીએમ શિંદેએ કહ્યું કે તેમણે પુણે જિલ્લા કલેક્ટર, આર્મી અને એનડીઆરએફ સાથે વાત કરી છે. સીએમ શિંદેએ કહ્યું કે ચિંતા કરવાની જરૂર નથી કારણકે વહીવટીતંત્ર એલર્ટ મોડ પર છે.

પુણેમાં એક જ દિવસમાં ચાર લોકોના મોત

બીજી તરફ નાયબ મુખ્યમંત્રી અને પુણેના પાલક મંત્રી અજિત પવારે ગુરુવારે સચિવાલયના કંટ્રોલ રૂમમાંથી પરિસ્થિતિનું નિરીક્ષણ કર્યું. પુણે શહેરમાં ગુરુવારે સવારે પાણીમાં ડૂબી જવાથી ત્રણ લોકોના મોત થયા હતા. તેઓ પાણીમાં ડૂબી ગયેલી તેમની ગાડીને બચાવવાનો પ્રયાસ કરી રહ્યા હતા. આ પ્રવાસ દરમિયાન આ અકસ્માત થયો હતો. જ્યારે મુલશી તાલુકામાં એક વ્યક્તિનું મોત થયું છે.