પોરબંદર નજીકના રાણા ખીરસરા ગામે મકાનમાંથી ૧,૮૩,૦૦૦ ના સોના ચાંદીના દાગીના ની ચોરી થતા પોલીસ ફરિયાદ નોંધાવવામાં આવી છે. જેમાં મહત્વની બાબત એ છે કે ફરિયાદી એ બહાર ગયો ત્યારે ચાવી રેતીના ઢગલામાં સંતાડી હતી તે બહાર કાઢીને જોતા બેવડી વળી ગયેલી મળી હતી તેથી ચાવી દ્વારા જ તાળું ખોલવામાં આવ્યું હોવાની શક્યતા ના આધારે પોલીસે તપાસ હાથ ધરી છે. મૂળ દોલતગઢ ગામે તથા હાલ રાણા ખીરસરા ગામે દિનેશભાઈ ગોધાણીની વાડીએ રહેતા રાજેશ નથુભાઈ ડાકી નામના ૩૫ વર્ષના યુવાને એવી પોલીસ ફરિયાદ નોંધાવી છે કે તે છેલ્લા આઠ વર્ષથી દિનેશભાઈ ની વાડીમાં ભાગ રાખીને ખેતી કામ કરે છે અને વાડીના મકાનમાં જ રહે છે. છઠ્ઠી સપ્ટેમ્બરે સવારે સાડા આઠ વાગ્યે રાજેશ તથા તેની પત્ની રમા અને દીકરી તેજલ અને દીકરો મિલન વગેરે રાણાવાવના મામલતદારની કચેરી ખાતે આધાર કાર્ડ લિંક કરાવવા માટે ગયા હતા. ઘરને તાળું મારીને ચાવી રૂમની બાજુમાં આવેલા રેતીના ઢગલામાં સંતાડી હતી! અને ત્યારબાદ રાણાવાવ કામ પૂરું થઈ જતા ફરિયાદી રાજેશ તથા તેમના પરિવારના સભ્યો આવ્યા ત્યારે રેતીના ઢગલા માંથી ચાવી કાઢીને તાળું ખોલવાની કોશિશ કરતા ચાવી બેવડી વળી ગયેલી હતી. જેના કારણે તાળું ખોલવાનો પ્રયત્ન કર્યો હતો પરંતુ ખુલી શક્યું ન હતું ત્યારબાદ અંતે હથોડી વડે તાળું તોડવામાં આવ્યું હતું અને અંદર રૂમ ખોલીને જતા કપડાં વેર વિખેર હતા તેમજ પતરાની પેટીમાં રાખેલા સોના ચાંદીના દાગીના જેવા કે સોનાના બે ચેન,વીંટી, ઝુમ્મર, કમરે બાંધવાનો ચાંદીનો જુડો સહિત ૧ લાખ ૮૩  હજાર ‚પિયાના દાગીના ચોરાઈ ગયા હતા. ઘરમેળે તપાસ કરવા છતાં દાગીના મળ્યા નહીં હોવાથી અંતે રાણાવાવ પોલીસ મથકમાં ચોરી અંગેની ફરિયાદ રાજેશ ડાકી એ નોંધાવી છે.