જામનગરમાં બીજી વખત મોસમનું નીચું તાપમાન ૧૨.૫ ડીગ્રી

December 10, 2025 11:38 AM

ઉત્તર ભારતમાં હિમવર્ષા અને ટાઢોડુ છવાઈ જવાના પગલે ધીમે ધીમે સૌરાષ્ટ્ર કચ્છમાં પણ ઠંડીની લહેર પ્રસરી ચૂકી છે. જેની સાથે સાથે જામનગર શહેર અને જિલ્લામાં પણ ગઈકાલથી ઠંડીનો ચમકારો વધ્યો છે અને આજે વહેલી સવારે ઠંડીનો પારો નીચે ગગડીને ૧૨.૫ ડીગ્રીએ સ્થિર થયો હોવાથી મોસમનું સૌથી નીચું તાપમાન નોંધાયું છે અને વાતાવરણમાં ઠંડક પ્રસરી ગઈ છે. જેના કારણે લોકો વહેલી સવારે ગરમ વસ્ત્રોમાં લપેટાયેલા જોવા મળે છે.

જામનગર શહેર અને જિલ્લામાં અગાઉ ઠંડીનો પારો નીચે સરકીને ૧૨.૫ ડીગ્રી સુધી નીચે આવ્યો હતો, પરંતુ ધીમે ધીમે ઠંડીમાં ઘટાડો જોવા મળ્યો હતો અને ઠંડોનો પારો ૨૦.૦ ડિગ્રી સુધી ઉપર પરત થયો હતો. પરંતુ તેમાં ગઈકાલથી પરિવર્તન આવ્યું છે. ખાસ કરીને ઉત્તર ભારતમાં થઈ રહેલી હિમવર્ષાને લઈને જ સમગ્ર રાજ્યમાં ઠંડીનો દોર શરૂ થઈ ગયો છે. સૌરાષ્ટ્ર કચ્છમાં બે દિવસથી ઠંડીનો ચમકારો વધ્યો છે જેમાં જામનગર શહેર-જિલ્લામાં પણ ટાઢોડું છવાયેલું જોવા મળી રહ્યું છે.

જામનગર જિલ્લા કલેકટર કચેરીના કંટ્રોલરૂમના જણાવ્યા અનુસાર આજે સવારે ૮.૦૦ વાગ્યે પુરા થતા ૨૪ કલાક દરમિયાન લઘુતમ તાપમાન ૧૨.૫ જ્યારે મહત્તમ તાપમાન ૨૯.૫ ડિગ્રી સેન્ટિગ્રેડ નોંધાયું છે. વાતાવરણમાં ભેજનું પ્રમાણ ૬૯ ટકા રહ્યું હતું, જ્યારે પવનની ગતિ સરેરાશ પ્રતિ કલાકના ૨૦ થી ૨૫ કિ.મી ની ઝડપે રહી હતી.

ઉત્તર-પૂર્વના પવનને કારણે ગઇકાલે ગીરનાર ઉપર ભારે પવન ફુંકાયો હતો અને તાપમાન ૮ ડીગ્રીએ પહોંચ્યું હતું જયારે નલીયાનું તાપમાન ૧૦ ડીગ્રીએ પહોંચ્યું હતું, આગામી દિવસોમાં ગુલાબી ઠંડી વધશે, એટલું જ નહીં સુકુ હવામાન રહેશે, અઠવાડીયા સુધી ઠંડીનો માહોલ રહેશે, ખાસ કરીને જામનગરમાં બીજી વખત લઘુતમ તાપમાન ૧૨.૫ ડીગ્રીએ પહોંચ્યું છે. આજે સવારે જામનગરમાં પણ ટાઢોડા જેવું વાતાવરણ જોવા મળ્યું હતું, ઠંડો પવન પણ ફુંકાયો હતો, ગઇકાલે રાત્રે ગામડાના વાતાવરણમાં પણ પલ્ટો આવ્યો હતો, આમ હવે ઠંડી વધવાથી લોકોએ પણ ગરમ કપડાનો સહારો લીધો હતો.

લાઈક અને ફોલો કરો અમારું ફેસબુક પેજ FACEBOOK - AAJKAALDAILY

ફોલો કરો અમારું ઇન્સ્ટાગ્રામ INSTAGRAM - AAJKAALDAILY

સબસ્ક્રાઈબ કરો અમારી યૂ ટ્યૂબ ચેનલ YOUTUBE - AAJKAALDAILY

મહત્વના સમાચારો આપના મોબાઇલમા મેળવવા માટે જોડાઓ અમારા વોટ્સએપ ગ્રૂપમાં 99251 12230

View News On Application

જામનગરમાં બીજી વખત મોસમનું નીચું તાપમાન ૧૨.૫ ડીગ્રી

Recent News

Gujarat's No. 1 evening newspaper