દક્ષિણ લેબનાનમાં ઈઝરાયેલની સેના (IDF) દ્વારા કરવામાં આવેલા ભીષણ હવાઈ હુમલામાં ત્રણ લેબનાની પત્રકારોએ જીવ ગુમાવ્યા છે. મળતી માહિતી મુજબ આ પત્રકારો ઈઝરાયેલ અને હિઝબુલ્લાહ વચ્ચે ચાલી રહેલા યુદ્ધનું કવરેજ કરી રહ્યા હતા ત્યારે તેમના મીડિયા વાહનને સીધું નિશાન બનાવવામાં આવ્યું હતું.

ઈઝરાયેલી સેનાનો ચોંકાવનારો દાવો
હુમલા બાદ ઈઝરાયેલી સેના (IDF) એ સોશિયલ મીડિયા પર એક પોસ્ટ શેર કરીને પત્રકાર અલી શોએબ પર ગંભીર આરોપો લગાવ્યા છે. IDF એ દાવો કર્યો છે કે અલી શોએબ પત્રકારના વેશમાં હિઝબુલ્લાહની 'રાદવાન ફોર્સ' નો આતંકવાદી હતો. સેનાએ જણાવ્યું કે, "તેની પ્રેસ જેકેટ માત્ર આતંકવાદનો એક મહોરું હતું." જોકે, ઈઝરાયેલે આ દાવા અંગે હજુ સુધી કોઈ પુરાવા રજૂ કર્યા નથી.
​​​​​​​

​​​​​​​લેબનાનના રાષ્ટ્રપતિ જોસેફ ઔને આ હુમલાની સખત શબ્દોમાં નિંદા કરી છે. તેમણે આ ઘટનાને 'જઘન્ય અપરાધ' ગણાવતા કહ્યું કે, સત્યને દબાવવા માટે પત્રકારોને નિશાન બનાવવામાં આવી રહ્યા છે. લેબનાની સત્તાવાળાઓએ આંતરરાષ્ટ્રીય સમુદાયને પત્રકારોની સુરક્ષા સુનિશ્ચિત કરવા અપીલ કરી છે.