વિશ્વની નંબર ૧ એપની વાત કરીએ તો, લોકો ઘણીવાર વિચારે છે કે ફેસબુક અથવા ટિકટોક પ્રથમ સ્થાન પર હશે, પરંતુ એવું નથી. હવે ઈન્સ્ટાગ્રામ આ બંને એપને પાછળ છોડીને નંબર વન પર પહોંચી ગયું છે. વાસ્તવમાં, કેટલાક દેશોમાં ટીકટોક પર પ્રતિબધં હોવાને કારણે ઈન્સ્ટાગ્રામને ફાયદો થયો છે. આ સિવાય ટીકટોકના પાછળ રહેવાના કેટલાક અન્ય કારણો પણ છે.

સેન્સર ટાવરના રિપોર્ટ અનુસાર, વિશ્વમાં ઈન્સ્ટાગ્રામના ડાઉનલોડમાં ૨૦ ટકાનો વધારો થયો છે. વર્ષ ૨૦૨૩માં ઈન્સ્ટાગ્રામ એપને ૭૬૭ મિલિયન વખત ડાઉનલોડ કરવામાં આવી હતી, જે એક વર્ષ પહેલા એટલે કે ૨૦૨૨ની સરખામણીમાં ૨૦ ટકા વધુ છે. ટીકટોકની વાત કરીએ તો તેને ૭૩.૩ કરોડ વખત ડાઉનલોડ કરવામાં આવ્યું હતું. આ ચાઈનીઝ એપ ભારતમાં પ્રતિબંધિત છે અને અમેરિકામાં તેને પ્રતિબંધિત કરવાની તૈયારી ચાલી રહી છે. ૨૦૨૦ થી ઇન્સ્ટાગ્રામની લોકપ્રિયતા વધી છે, કારણ કે રીલ્સ આ વર્ષે લોન્ચ કરવામાં આવી હતી. લોકોના વીડિયોના ક્રેઝ બાદ જ ઈન્સ્ટાગ્રામ રીલ્સ લોન્ચ કરવામાં આવી હતી. ઇન્સ્ટાગ્રામ રીલ્સ એક એવી સુવિધા છે જેમાં યુઝર્સ શોર્ટ કિલપ્સ બનાવીને આ પ્લેટફોર્મ પર વીડિયો શેર કરી શકે છે.ઇન્સ્ટાગ્રામનું રીલ્સ ફીચર યુવા પેઢીમાં સૌથી વધુ લોકપ્રિય છે. યુવાનો અલગ–અલગ વિષયો પર વીડિયો બનાવે છે અને ઈન્સ્ટાગ્રામ પર શેર કરે છે. ઇન્સ્ટાગ્રામ એપની વધતી જતી લોકપ્રિયતાનું આ એક મોટું કારણ છે