ભારતે ત્રીજી T20 મેચમાં ઝિમ્બાબ્વેને 23 રનના અંતરથી હરાવ્યું છે. આ સાથે ભારતીય ટીમે 5 મેચની સિરીઝમાં 2-1ની લીડ મેળવી લીધી છે. પ્રથમ બેટિંગ કરવા આવેલી ભારતીય ટીમ માટે કેપ્ટન શુભમન ગિલે 66 રનની અડધી સદીની ઇનિંગ રમી હતી. બીજી તરફ ઋતુરાજ ગાયકવાડ તેની ફિફ્ટી ચૂકી ગયો હતો તેમણે 49 રનની શાનદાર ઇનિંગ રમી હતી. યશસ્વી જયસ્વાલે પણ 36 રન બનાવ્યા અને ટીમ ઈન્ડિયાને 182 રનના વિશાળ સ્કોર સુધી પહોંચાડવામાં મદદ કરી હતી. ટાર્ગેટનો પીછો કરવા ઉતરેલી ઝિમ્બાબ્વે આ વખતે પણ ખરાબ શરૂઆત બાદ રિકવર કરી શકી નહોતી.

પ્રથમ બેટિંગ કરતા ભારતીય ટીમે 20 ઓવરમાં 4 વિકેટ ગુમાવીને 182 રન બનાવ્યા હતા. ભારતે આપેલા સ્કોરનો પીછો કરવા ઉતરેલી ઝિમ્બાબ્વેની ટીમ 159 રન જ બનાવી શક્યું હતુ.

ભારતીય ક્રિકેટ ટીમ હાલ ઝિમ્બાબ્વે પ્રવાસ પર છે. આ પાંચ મેચની T20 શ્રેણીની પ્રથમ મેચમાં ભારતને હારનો સામનો કરવો પડ્યો હતો. ભારતે બીજી T20 મેચમાં જોરદાર વાપસી કરીને મેચ 100 રનથી જીતીને શ્રેણીમાં 1-1ની બરાબરી હાંસલ કરી હતી. હવે ત્રીજી T20 મેચ આજે એટલે કે 10 જુલાઈએ રમાઈ હતી. જેમાં ભારતે ઝિમ્બાબ્વેને ત્રીજી T20માં 23 રને હરાવ્યું.