ભારતીય મૂળના ડેમોક્રેટિક પાર્ટીના ઉમેદવાર ઝોહરાન મમદાની ન્યૂયોર્કના પ્રથમ મુસ્લિમ મેયર તરીકે ચુટાઈ આવ્યા છે.આ સાથે મમદાનીને સૌથી યુવા વયે અમેરિકાના સૌથી મોટા શહેરોમાંના એક ન્યૂયોર્કમાં મેયર બનવાનો યશ મળ્યો છે. તેમણે શાનદાર પ્રદર્શન સાથે મેયરની ચૂંટણી જીતી છે. મમદાની છેલ્લા 100 વર્ષમાં ન્યૂ યોર્કના સૌથી યુવા અને પ્રથમ ભારતીય-અમેરિકન મુસ્લિમ મેયર બન્યા છે. નોંધપાત્ર વાત એ છે કે, યુએસ રાષ્ટ્રપતિ ડોનાલ્ડ ટ્રમ્પ ઇચ્છતા ન હતા કે મમદાની જીતે, પરંતુ હવે ટ્રમ્પને પણ ઝટકો લાગ્યો છે.મમદાની પહેલેથી જ ટ્રમ્પના વિરોડી રહ્યા છે અને તેઓ જરાય ઈચ્છતા ન હતા કે મમદાની મેયર બને, પરંતુ ટ્રમ્પની બાજી ઉંધી પડી ગઈ છે.

મમદાની માત્ર 34 વર્ષની ઉંમરે ન્યૂ યોર્ક સિટીના મેયર બન્યા છે. ચૂંટણી સર્વેક્ષણોમાં તેઓ આ પદ માટે સૌથી લોકપ્રિય ઉમેદવાર તરીકે ઉભરી આવ્યા હતા. મમદાની પ્રખ્યાત ફિલ્મ નિર્માતા મીરા નાયરના પુત્ર છે અને પોતે ભૂતપૂર્વ રેપર (સંગીત કલાકાર) છે. તેમનો જન્મ યુગાન્ડાના કમ્પાલામાં થયો હતો. જોકે, તેઓ સાત વર્ષની ઉંમરે ન્યૂ યોર્ક ગયા અને નાગરિક બન્યા.ન્યૂ યોર્કની મેયરની ચૂંટણીમાં મમદાની સાથે અન્ય બે ઉમેદવારો મેદાનમાં હતા. ન્યૂ યોર્કના ભૂતપૂર્વ ગવર્નર એન્ડ્રુ કુઓમોએ અપક્ષ તરીકે ચૂંટણી લડી હતી, જો કે તેઓ અગાઉ ડેમોક્રેટિક પાર્ટીના સભ્ય હતા. રિપબ્લિકન પાર્ટીએ પણ કર્ટિસ સ્લિવાને મેદાનમાં ઉતાર્યા હતા, પરંતુ કુઓમો અને કર્ટિસ નિરાશ થયા હતા. બંને ઉમેદવારો મતદાનમાં પાછળ હતા.

ઓબામાએ મમદાનીને અભિનંદન આપ્યા

અમેરિકાના ભૂતપૂર્વ રાષ્ટ્રપતિ બરાક ઓબામાએ મમદાનીને તેમની જીત બદલ અભિનંદન આપ્યા. તેમણે એક પોસ્ટમાં લખ્યું, "જીતેલા તમામ ડેમોક્રેટિક ઉમેદવારોને અભિનંદન. આ સાબિત કરે છે કે જ્યારે આપણી પાસે મજબૂત અને દૂરંદેશી નેતાઓ હોય છે જેઓ આપણે જે મુદ્દાઓ કે સમસ્યાઓનો સામનો કરીએ છીએ તેની કાળજી રાખે છે, ત્યારે આપણે જીતી શકીએ છીએ. આપણી પાસે હજુ ઘણું કામ કરવાનું બાકી છે, પરંતુ ભવિષ્ય ઉજ્જવળ દેખાય છે.

હિન્દી બોલી શકતા મમદાની કોણ છે અને તેનું બેકગ્રાઉન્ડ શું છે

મમદાનીની જીંદગી ખૂબ જ રસપ્રદ છે. તેમના પિતા પ્રોફેસર છે, જ્યારે તેમની માતા એક પ્રખ્યાત ભારતીય ફિલ્મ નિર્માતા છે.ઝોહરાન ક્વામે મમદાનીનો જન્મ 18 ઓક્ટોબર, 1991 ના રોજ યુગાન્ડાની રાજધાની કમ્પાલામાં થયો હતો. તેમના પિતા, મહમૂદ મમદાની, આફ્રિકન રાજકારણ અને ઇતિહાસના પ્રખ્યાત વિદ્વાન છે, જ્યારે તેમની માતા, મીરા નાયર, "મોન્સૂન વેડિંગ" અને "ધ નેમસેક" જેવી જાણીતી ફિલ્મોના દિગ્દર્શક છે. બાળપણમાં, મમદાનીનો પરિવાર યુગાન્ડાથી દક્ષિણ આફ્રિકા અને પછી ન્યૂ યોર્ક સ્થળાંતર થયો હતો. તેમણે બેંક સ્ટ્રીટ સ્કૂલ ફોર ચિલ્ડ્રન અને બ્રોન્ક્સ હાઇ સ્કૂલ ઓફ સાયન્સમાં અભ્યાસ કર્યો અને 2014 માં બોડોઇન કોલેજમાંથી આફ્રિકાના સ્ટડીઝમાં ડિગ્રી મેળવી. મમદાની હિન્દી સારી રીતે બોલે છે અને ભારતીય મતદારોને આકર્ષવા માટે હિન્દીમાં પોતાનું અભિયાન ચલાવ્યું.કોલેજના દિવસોમાં, તેમણે પેલેસ્ટાઇનમાં સ્ટુડન્ટ્સ ફોર જસ્ટિસ સંગઠનના સ્થાનિક પ્રકરણની સહ-સ્થાપના કરી. બાદમાં તેમણે ફોરક્લોઝર નિવારણ સલાહકાર તરીકે કામ કર્યું અને ધીમે ધીમે રાજકીય રીતે સક્રિય બન્યા. 2017 માં, ઝોહરાન મામદાનીએ ડેમોક્રેટિક સોશિયાલિસ્ટ્સ ઓફ અમેરિકામાં જોડાઈને ન્યૂ યોર્કના રાજકારણમાં પોતાની હાજરી સ્થાપિત કરી. 2020 માં, તેમણે ક્વીન્સમાં 36મા જિલ્લા માટે ડેમોક્રેટિક પ્રાથમિક ચૂંટણી જીતી અને રાજ્ય વિધાનસભામાં પ્રવેશ કર્યો. 2022 અને 2024 માં તેઓ ફરીથી બિનહરીફ ચૂંટાયા. આજ સુધી, તેમણે 20 બિલ રજૂ કર્યા છે, જેમાંથી ત્રણ કાયદા બની ગયા છે.

પત્ની રામાએ પડદા પાછળ ભજવી મહત્વની ભૂમિકા

ઝોહરાન મમદાનીની પત્ની, રામા દુવાજીએ તેમના પ્રચારમાં મહત્વપૂર્ણ ભૂમિકા ભજવી હતી. જ્યારે તે જાહેરમાં ઓછી દેખાતી હતી, ત્યારે પડદા પાછળ તેમની હાજરી અત્યંત પ્રભાવશાળી રહી છે. 28 વર્ષીય રામા દુવાજી વ્યવસાયે એક કલાકાર છે અને તેમણે ઝુંબેશની દ્રશ્ય ઓળખ ડિઝાઇન કરી હતી, જેમાં મેટ્રોકાર્ડ યલો, મેટ્સ બ્લુ અને ફાયરહાઉસ રેડ રંગો અને બોલ્ડ, બોડેગા-શૈલી ટાઇપોગ્રાફીનો સમાવેશ થાય છે. તેણીએ સોશિયલ મીડિયા ભાષા અને બ્રાન્ડિંગ પર પણ વ્યાપકપણે કામ કર્યું હતું.

ટેક્સાસમાં જન્મેલા અને કતારના દુબઈમાં ઉછરેલા, દુવાજીએ ન્યૂ યોર્કની સ્કૂલ ઓફ વિઝ્યુઅલ આર્ટ્સમાંથી માસ્ટર ડિગ્રી મેળવી છે. આ દંપતી 2021 માં ડેટિંગ એપ હિન્જ પર મળ્યા હતા, 2024 માં સગાઈ કરી હતી અને આ વર્ષે લગ્ન કર્યા હતા. જો કે, દુબઈમાં એક ભવ્ય સમારોહ દરમિયાન થયેલી તેમની સગાઈએ સોશિયલ મીડિયા પર થોડી ટીકા કરી હતી, કારણ કે ઝોહરાન પોતાને સમાજવાદી તરીકે વર્ણવે છે. તેમ છતાં, રમા દુવાજીએ આ ટીકાને ગંભીરતાથી લીધી અને સર્જનાત્મક ઉર્જા અને ભાવનાત્મક સમર્થનથી તેમના પતિના ચૂંટણી પ્રચારને વેગ આપવાનું ચાલુ રાખ્યું.