રાજકોટ ટીઆરપી ગેમઝોનમાં એક પછી એક નવા ધડાકા થવા માંડયા છે. આ ગેમઝોન સ્થાનીક ઉચ્ચ અધિકારીઓથી લઈ પદાધિકારીઓ, મહાનુભાવો જતા હતાની વાતો તો બહાર આવી હતી પરંતુ ગેમઝોન ભારતીય ક્રિકેટરોએ પણ દોઢ વર્ષ પહેલા ધુબાકા લગાવ્યા હતાનો વીડિયો વાયરલ થતાં ચકચાર મચી જવા પામી છે. 
​​​​​​​
ગેરકાયદે ટીઆરપી ગેમઝોન ૨૭ માનવ જીંદગીઓને હડપ કરી જતાં ભારે ચર્ચામાં આવી છે. એ પહેલા ગેમઝોન અનેકનો માનીતો ગેમઝોન હતો. જેમાં ક્રિકેટરો પણ બાકાત રહી શકયા નથી. આ ગેમઝોનમાં પુર્વ મ્યુનિ. કમિશનર અરોરા, કલેકટર અ‚ણ મહેશ બાબુ, પુર્વ ડીસીપી બલરામ મીણા સહિતના જઈ આવ્યા હતા અને તેના ફોટા વાયરલ થયા હતા. આ ઉપરાંત અનેક એવા મોટામાથા હતા કે, ગેમઝોનમાં સમયાંતરે મુલાકાત લેતા હતા અને મોજ માણતા હતા. આગની ઘટના બાદ હજુ તો આ ગેરકાયદે ગેમઝોનમાં ગયેલા ઉચ્ચ અધિકારીઓની ચર્ચા અને તપાસ ચાલી રહી છે. એવામાં આ ગેમઝોનમાં ક્રિકેટરો પણ મુલાકાતે ગયા હતાનો વીડિયો વાયરલ થયો છે. 
ટીઆરપી ગેમઝોન ઈસ્ટાના એકાઉન્ટમાં ઓકટોબર-૨૦૨૨ના સમયગાળામાં આ વીડિયોમાં ભારતીય પાંચથી છ ક્રિકેટરો આ ગેમઝોનમાં મજા-મસ્તી કરતા હોવાનો વીડિયો સામે આવ્યો છે. ક્રિકેટરો એકબીજાને પકડીને જંપીંગ કરે છે તો ત્યાર બાદ પડતું મુકતા હોય અને કુશન જેવી વસ્તુઓના ઘા કરતા હોય તેવો વીડિયો છે. જો કે, આ વાયરલ વીડિયો કોનો છો ? કયા ક્રિકેટરનો છે ? તે બાબતે આજકાલ અખબાર કોઈ પુષ્ટી કરતું નથી.