અમેરિકામાં ભારતીય મૂળના જજને નાની ભૂલ માટે જેલના સળિયા પાછળ જવું પડ્યું છે. આરોપ એવો છે કે ફોર્ટ બેન્ડ કાઉન્ટીના ન્યાયાધીશ કે.પી. જ્યોર્જે તેમની ચૂંટણીના પરિણામોને પ્રભાવિત કરવાના હેતુથી સોશિયલ મીડિયા પર પોતાના વિશે ખોટી માહિતી જાહેર કરી હતી. જેથી તેને ગુરુવારે સાંજે જેલમાં મોકલી દેવામાં આવ્યા હતા.

ફોર્ટ બેન્ડ કાઉન્ટીના ન્યાયિક રેકોર્ડ્સ અનુસાર, જજ તરીકેની ચૂંટણી દરમિયાન મતદારોને આકર્ષિત કરવાના હેતુથી સોશિયલ મીડિયા પર ખોટી માહિતી ફેલાવવાને લીધે સાંજે 7:17 વાગ્યે જ્યોર્જ સામે કેસ નોંધવામાં આવ્યો હતો. જ્યોર્જના કાર્યાલયના એક નિવેદનમાં કહેવામાં આવ્યું છે કે તેને વ્યક્તિગત બોન્ડ પર જેલમાંથી મુક્ત કરવામાં આવ્યો છે, જેનો અર્થ છે કે તેણે નિર્ધારિત સમયે કોર્ટમાં હાજર રહેવા માટે લેખિત કરાર આપવો પડશે અને સહી કર્યા બાદ મુક્તિની તમામ શરતોનું પાલન કરવું પડશે.

2022માં તેમના ચૂંટણી પ્રચાર દરમિયાન, જ્યોર્જે દાવો કર્યો હતો કે તે "જાતિવાદી અને ઝેનોફોબિક" હુમલાઓનો ભોગ બન્યા હતા. જો કે, સહાનુભૂતિ અને સમર્થન મેળવવા માટે તેણે આવું કર્યું હોવાના આરોપો છે. ભારતથી પરત ફર્યા બાદ જ્યોર્જના ઘરે વોરંટ મોકલવામાં આવ્યું હતું. તેણે તેના ભૂતપૂર્વ ચીફ ઓફ સ્ટાફ તરલ પટેલ સાથે મળીને આ છેતરપિંડી કરી હતી. પટેલે સહાનુભૂતિ મેળવવા માટે પોતાની અને જ્યોર્જ પર હુમલો કરવા માટે નકલી પ્રોફાઇલ્સ બનાવી હતી.