સંયુક્ત રાષ્ટ્રમાં ભારતના કાયમી પ્રતિનિધિ, રાજદૂત પી હરીશે જણાવ્યું હતું કે પ્રતિનિધિત્વના આધાર તરીકે ધર્મ અને શ્રદ્ધા જેવા નવા માપદંડો રજૂ કરવાનો પ્રયાસ પ્રાદેશિક પ્રતિનિધિત્વથી તદ્દન વિપરીત છે. જે સંયુક્ત રાષ્ટ્રમાં પ્રતિનિધિત્વ માટે સ્વીકૃત આધાર રહ્યો છે. ટિપ્પણી કરતા પહેલા હરીશે જી-4 દેશો - બ્રાઝિલ, જર્મની, જાપાન અને ભારત વતી એક નિવેદન આપ્યું જેમાં જૂથે ભાર મૂક્યો કે પ્રાદેશિક પ્રતિનિધિત્વ એક સ્વીકૃત પ્રથા છે જે સંયુક્ત રાષ્ટ્રમાં સમયની કસોટી પર ખરી ઉતરી છે.

તેમણે કહ્યું કે વિસ્તૃત અને નવી સુરક્ષા પરિષદ અસરકારક નહીં રહે તેવી દલીલો વાસ્તવિક સુધારાને રોકવાનો પ્રયાસ છે. તેમણે કહ્યું કે યોગ્ય કાર્યકારી પ્રક્રિયાઓ અને જવાબદારી પદ્ધતિઓ સાથે નવી પરિષદ મહત્વપૂર્ણ વૈશ્વિક મુદ્દાઓ પર અર્થપૂર્ણ રીતે કાર્ય કરી શકશે.

જી4 એ કહ્યું કે સંયુક્ત રાષ્ટ્રનું વર્તમાન સ્વરૂપ બીજા યુગનું છે, જે હવે અસ્તિત્વમાં નથી અને વર્તમાન ભૂ-રાજકીય પરિસ્થિતિઓ આ સ્વરૂપની સમીક્ષાની માંગ કરે છે. હાલમાં સુરક્ષા પરિષદમાં પાંચ કાયમી સભ્યો છે - ચીન, ફ્રાન્સ, રશિયા, બ્રિટન અને અમેરિકા. બાકીના 10 સભ્યોને બે વર્ષના ગાળા માટે અસ્થાયી સભ્યો તરીકે ચૂંટવામાં આવે છે. ભારત છેલ્લે 2021-22 માં અસ્થાયી સભ્ય તરીકે કાઉન્સિલમાં જોડાયું હતું.