કિંગ્સ કોલેજ લંડનમાં આંતરરાષ્ટ્રીય સંબંધોના સિનિયર લેક્ચરર ડૉ. વોલ્ટર લાડવિગે દક્ષિણ એશિયામાં અમેરિકાની વ્યૂહાત્મક પ્રાથમિકતાઓ અંગે એક મોટું નિવેદન આપ્યું છે. તેમણે સ્પષ્ટપણે કહ્યું કે ભારતે પોતાનું ધ્યાન પાકિસ્તાનથી હટાવીને ચીન જેવા મોટા વ્યૂહાત્મક પડકાર તરફ વાળવું જોઈએ.તેમણે કહ્યું કે અમેરિકાનું લાંબા સમયથી લક્ષ્ય ભારતને ઈન્ડો-પેસિફિક ક્ષેત્રમાં એક મહત્વપૂર્ણ ભાગીદાર તરીકે વિકસાવવાનું રહ્યું છે, અને પ્રાદેશિક સંઘર્ષ આ દિશાને નબળી પાડે છે. આ દરમિયાન, તેમણે ઓપરેશન સિંદૂર દરમિયાન ભારતની ચોકસાઈ ક્ષમતાઓની પ્રશંસા કરી.

લાડવિગ જણાવ્યું હતું કે, "જ્યોર્જ ડબલ્યુ. બુશના યુગથી દરેક યુએસ સરકાર ભારતને ઇન્ડો-પેસિફિક ક્ષેત્રમાં એક મહત્વપૂર્ણ વ્યૂહાત્મક ભાગીદાર બનાવવા માટે કામ કરી રહી છે. જો ભારત પાકિસ્તાન સાથે સંઘર્ષમાં ફસાયેલું રહે છે, તો તે એશિયાના મોટા ચિત્ર પરથી ધ્યાન ગુમાવી શકે છે અને આ અમેરિકાના હિતમાં નથી.

ભારતની નીતિઓમાં મોટો ફેરફાર

તેમણે કહ્યું કે પુલવામા હુમલા પછી ભારત દ્વારા કરવામાં આવેલા હવાઈ હુમલા દર્શાવે છે કે ભારત હવે રક્ષણાત્મક વ્યૂહરચનાથી દૂર થઈ ગયું છે અને આક્રમક આતંકવાદ વિરોધી નીતિ અપનાવી છે. તેમણે કહ્યું, "પહેલાં ભારતીય સરકારો આતંકવાદ સંબંધિત ઘટનાઓ માટે પુરાવા એકત્રિત કરતી હતી, પરંતુ હવે એવી નીતિ બની ગઈ છે કે જો કોઈ દેશ પોતાના ક્ષેત્રમાં આતંકવાદી સંગઠનોને આશ્રય આપવાનું બંધ ન કરે તો ભારત સીધો લશ્કરી જવાબ આપી શકે છે.

ભારતની સ્થિરતા અમેરિકા માટે કેમ મહત્વપૂર્ણ

લાડવિગે એમ પણ કહ્યું કે ભારતનો આર્થિક વિકાસ દર લગભગ 7% ખૂબ જ પ્રભાવશાળી છે, પરંતુ તેના તમામ વિકાસ લક્ષ્યોને પ્રાપ્ત કરવા માટે તેને વધુ ઝડપથી વિકાસ કરવાની જરૂર છે. "પાકિસ્તાન સાથે લાંબા સમય સુધી સંઘર્ષ આ વિકાસને જોખમમાં મૂકી શકે છે, અને તેથી જ અમેરિકા માટે એ સુનિશ્ચિત કરવું પણ મહત્વપૂર્ણ છે કે ભારત-પાકિસ્તાન તણાવ ન વધે."

યુદ્ધવિરામ બન્ને દેશોનો સ્વતંત્ર નિર્ણય

તાજેતરના યુદ્ધવિરામ પ્રયાસો અંગે, લાડવિગે કહ્યું કે તણાવ ઓછો થવાનું કારણ વિદેશી મધ્યસ્થી કરતાં બંને દેશોની ઇચ્છાશક્તિ વધુ હતી. તેમણે સ્પષ્ટતા કરી, "ભારત અને પાકિસ્તાને લશ્કરી કાર્યવાહી અને ગોળીબાર બંધ કરવા માટે કરાર કર્યો હતો. આ બંને પક્ષોની સંમતિથી થયું હતું અને તેમાં યુએસ રાષ્ટ્રપતિ ડોનાલ્ડ ટ્રમ્પ દ્વારા વર્ણવ્યા મુજબ દબાણ કે મધ્યસ્થીની કોઈ ભૂમિકા નહોતી.આ ઉપરાંત, તેમણે ઓપરેશન સિંદૂર દરમિયાન ભારતની ચોકસાઈવાળી લશ્કરી ક્ષમતાઓ અને જાહેર સંવાદમાં વધુ સારા પ્રદર્શનની પણ પ્રશંસા કરી. તેમણે કહ્યું, "ભારતે પાકિસ્તાન કરતાં વધુ અસરકારક રીતે કાર્યવાહી કરી છે અને તેમના ચિત્રો અને માહિતી જાહેરમાં ઉપલબ્ધ છે, જે ભારતીય દાવાઓને મજબૂત બનાવે છે."