હોળી પૂર્વેના બે ત્રણ દિવસથી સૌરાષ્ટ્ર કચ્છ સહિત રાજ્યભરમાં શરૂ થયેલો માવઠાનો સિલસિલો થોડા થોડા સમયના અંતરે ચાલુ રહ્યા બાદ આખરે તેને આજથી બ્રેક લાગી ગઈ છે. છેલ્લા 24 કલાક દરમિયાન રાજ્યના છ તાલુકામાં સામાન્ય ઝાપટા પડ્યા છે પરંતુ ક્યાંય 6 મીલીમીટરથી વધુ વરસાદ નોંધાયો નથી.
હવામાન ખાતાના જાણકારોના કહેવા મુજબ રાજસ્થાનમાં સાયક્લોનિક સર્ક્યુલેશન છે. હિમાલયન રીજીયનમાં વેસ્ટર્ન ડિસ્ટર્બન્સ અને સાઇક્લોનિક સર્ક્યુલેશન જોવા મળ્યું છે. આ સિસ્ટમની અસરના ભાગરૂપે પૂર્વ, દક્ષિણના રાજ્યોમાં વરસાદ પડી રહ્યો છે. પરંતુ તેની અસર ગુજરાત સુધી પહોંચે તેવી શક્યતા ન હોવાના કારણે હાલ પૂરતા ગુજરાતમાં માવઠાના માઠા દિવસો પૂરા થયા હોય તેવું લાગી રહ્યું છે.

માવઠાનો રાઉન્ડ પૂરો થયો છે પરંતુ આજથી ગરમીનું જોર વધવાની શરૂઆત થઈ જશે અને આગામી ત્રણ દિવસમાં જ ચાર ડિગ્રી જેટલું તાપમાન વધી જશે. માવઠાના વાતાવરણના કારણે મહત્તમ તાપમાનનો પારો 32 થી 34 ડિગ્રી વચ્ચે હતો તે 34 થી 38 ડિગ્રીની રેન્જમાં આવી જવાની શક્યતા છે. કમોસમી વરસાદના કારણે ખેડૂતોને પારાવાર નુકસાન થયું છે. આ ઉપરાંત રોગચાળાનું પ્રમાણ પણ વધી ગયું છે. માવઠાનો માહોલ પૂરો થયો હોવા છતાં સવારના ભાગે વાતાવરણમાં ભેજનું પ્રમાણ વધુ રહે છે.