કડકડતી ઠંડીમાં ગરમાગરમ પરાઠા અને ગરમાગરમ ચાનો કપ,આહાહા! શિયાળાની ઋતુમાં ગરમાગરમ પરોઠા ખાવા બધાને ગમે છે. મોટાભાગે બટેટા, ગાજર, કોબી, મૂળા અથવા પાલકના બનેલા પરોઠા ખાતા હશો, પરંતુ હવે કંઈક નવીન અને સ્વાદિષ્ટ બટાકા-મેથીના પરોઠા ટ્રાય કરજો. બટેટાનો સ્વાદ અને મેથીની સુગંધનું જાદુઈ સંયોજન વાનગીને સ્વાદથી ભરપુર બનાવે છે. મેથી પરોઠામાં બટેટાનું સ્ટફિંગ જે અનોખું કોમ્બીનેશન છે તે નાસ્તાને સ્વાદિષ્ટ તો બનાવશે જ પણ દિવસભર ઉર્જાવાન પણ રાખશે. જાણો સ્વાદિષ્ટ પરોઠા બનાવવાની સરળ રેસીપી.

બટેટા-મેથી પરોઠા બનાવવા માટેની સામગ્રી

કણક માટે:

 2 કપ ઘઉંનો લોટ

 1/2 ચમચી મીઠું

 1/2 ચમચી અજમો

 1 ચમચી તેલ

 પાણી (લોટ બાંધવા માટે)

બટેટાનું સ્ટફિંગ:

 2 મોટા બટાટા (બાફેલા અને છૂંદેલા)

 1 કપ મેથી (બારીક સમારેલી)

 1 ચમચી આદુ-લસણની પેસ્ટ

 1/2 ચમચી હળદર પાવડર

 1/2 ચમચી લાલ મરચું પાવડર

 1/4 ચમચી ગરમ મસાલો

 1/4 ચમચી ધાણા પાવડર

 સ્વાદ મુજબ મીઠું

 1 લીલું મરચું (ઝીણું સમારેલું)

 લીલી કોથમીર(ઝીણી સમારેલી)

 તળવા માટે તેલ

બટેટા-મેથી પરોઠા બનાવવાની રીત

• સૌથી પહેલા એક મોટા બાઉલમાં ઘઉંનો લોટ, મીઠું, અજમો અને તેલ ઉમેરો. થોડું-થોડું પાણી ઉમેરો અને નરમ લોટ બાંધો. લોટને ઢાંકીને 15-20 મિનિટ માટે બાજુ પર રાખો.
  
  
• હવે એક પેનમાં તેલ ગરમ કરો. તેમાં આદુ-લસણની પેસ્ટ ઉમેરીને સાંતળો. હવે તેમાં લીલું મરચું, હળદર પાવડર, લાલ મરચું પાવડર, ગરમ મસાલો, ધાણા પાવડર અને મીઠું ઉમેરીને બરાબર મિક્ષ કરી લો.
  
  
• પછી તેમાં મેશ કરેલા બટાટા અને મેથી નાખીને મિશ્રણને બરાબર મિક્ષ કરી લો. ગેસ બંધ કરો અને લીલા ધાણા ઉમેરી મિક્સ કરો.
  
  
• ત્યારબાદ લોટના નાના-નાના બોલ બનાવી લો. દરેક કણકના બોલને પાટલી ઉપર પાતળા રોલ વણી લો. બટાટાના મિશ્રણને વચ્ચે ભરો અને તેને ગોળાકાર આકાર આપવા માટે કિનારીઓને ફોલ્ડ કરો.

• હવે એક પેન ગરમ કરો અને થોડું તેલ લગાવો. પરોઠાને તવા પર મૂકો અને બંને બાજુથી ગોલ્ડન થાય ત્યાં સુધી પકાવો.
  
  
• ગરમાગરમ બટેટા-મેથીના પરોઠાને દહીં, અથાણું કે ડુંગળી સાથે સર્વ કરો.

ખાસ ટીપ્સ

• જો ઓછા તેલમાં પરોઠા બનાવવા માંગતા હોય તો તવા પર થોડું પાણી છાંટી શકો છો.
  
  
• બટાટાના મિશ્રણમાં પસંદગી મુજબ અન્ય શાકભાજી પણ ઉમેરી શકો છો જેમ કે ગાજર, વટાણા વગેરે.
  
  
• તેને વધુ સ્વાદિષ્ટ બનાવવા માટે પરોઠામાં થોડી કસૂરી મેથી પણ ઉમેરી શકો છો.
  
  
• જો સમય ઓછો હોય, તો બટાટાનું મિશ્રણ અગાઉથી તૈયાર કરી શકો છો અને તેને રેફ્રિજરેટરમાં રાખી શકો છો.