જયપુરમાં યોજાયેલા ઇન્ટરનેશનલ ઇન્ડિયન ફિલ્મ એકેડેમી (IIFA) એવોર્ડ સમારોહમાં 'લાપતા લેડીઝ' ફિલ્મે સૌથી વધુ 10 એવોર્ડ જીતીને ધમાલ મચાવી હતી. આ સમારોહ ગુજરાત માટે ખાસ રહ્યો, કારણ કે પહેલીવાર ગુજરાતના કલાકારોએ ત્રણ એવોર્ડ જીત્યા. જાનકી બોડીવાલાને બેસ્ટ એક્ટ્રેસ ઇન સપોર્ટિંગ રોલ, સ્નેહા દેસાઈને બેસ્ટ સ્ક્રીનપ્લે અને મોનાલ ઠાકરને બેસ્ટ ડાયલોગ્સ માટે એવોર્ડ મળ્યો હતો.

'લાપતા લેડીઝ' ફિલ્મને બેસ્ટ ફિલ્મનો એવોર્ડ પણ મળ્યો હતો. કાર્તિક આર્યનને 'ભૂલ ભુલૈયા 3' માટે બેસ્ટ એક્ટરનો એવોર્ડ અને નિતાંશી ગોયલને 'લાપતા લેડીઝ' માટે બેસ્ટ એક્ટ્રેસનો એવોર્ડ મળ્યો હતો. રાકેશ રોશનને આઉટસ્ટેન્ડિંગ અચીવમેન્ટ ઓફ ઈન્ડિયન સિનેમાનો એવોર્ડ મળ્યો હતો. રાજકોટના મોનાલ ઠાકરે 'આર્ટિકલ 370' ફિલ્મના ડાયલોગ્સ માટે બેસ્ટ ડાયલોગ્સનો એવોર્ડ જીત્યો હતો.

રાજકોટના મોનાલ ઠાકરે એવોર્ડ સ્વીકારતી વખતે 'આર્ટિકલ 370'ની આખી ટીમ અને દેશના સૈન્ય જવાનોનો આભાર માન્યો હતો. બાદમાં, માતા-પિતા અને ભાઈનો આભાર માનતા પોતાની સ્પીચ પૂર્ણ કરી હતી. આ સમારોહમાં બોલિવૂડના અનેક દિગ્ગજ કલાકારોએ હાજરી આપી હતી.