ચંદીગઢ સ્થિત IDFC First Bankની એક મુખ્ય શાખામાં કરોડો રૂપિયાની છેતરપિંડીનો પર્દાફાશ થયો છે. બેંકે સત્તાવાર રીતે સ્વીકાર્યું છે કે તેની આ શાખામાં 590 કરોડ રૂપિયાની મોટી ઉચાપત થઈ છે. આ સમગ્ર મામલાનો સૌથી ચોંકાવનારો પાસું એ છે કે આ નાણાં હરિયાણા સરકારના વિવિધ ખાતાઓ સાથે જોડાયેલા હતા અને બેંકના જ કર્મચારીઓએ આ કૌભાંડ આચર્યું છે.

કેવી રીતે ફૂટ્યો ભાંડો?
આ આખું કૌભાંડ કોઈ તપાસ એજન્સી દ્વારા નહીં, પરંતુ એક સામાન્ય બેંકિંગ પ્રક્રિયા દરમિયાન પકડાયું હતું. તારીખ ૧૮ ફેબ્રુઆરી ૨૦૨૬ પછી હરિયાણા સરકારની કેટલીક સંસ્થાઓએ ચંદીગઢની આ શાખાનો સંપર્ક કર્યો હતો. સરકાર આ બેંકમાં રહેલા પોતાના ખાતા બંધ કરી તમામ રકમ અન્ય કોઈ બેંકમાં ટ્રાન્સફર કરવા માંગતી હતી. જ્યારે ટ્રાન્સફરની પ્રક્રિયા શરૂ થઈ ત્યારે જાણવા મળ્યું કે સરકારી દસ્તાવેજોમાં જે બેલેન્સ હતું અને બેંકની સિસ્ટમમાં જે વાસ્તવિક બેલેન્સ હતું, તેમાં આશરે 590 કરોડ રૂપિયાનું અંતર હતું. એટલે કે, જે નાણાં ખાતામાં હોવા જોઈએ તે ગાયબ હતા.

બેંકની કડક કાર્યવાહી
આટલી મોટી ગેરરીતિ સામે આવતા જ IDFC First Bank મેનેજમેન્ટ હરકતમાં આવ્યું છે. બેંકે પ્રાથમિક તપાસ બાદ 4 કર્મચારીઓને તાત્કાલિક અસરથી સસ્પેન્ડ કરી દીધા છે. સ્ટોક એક્સચેન્જને આપેલી માહિતીમાં બેંકે સ્પષ્ટ કર્યું છે કે આ છેતરપિંડીમાં સામેલ કોઈ પણ વ્યક્તિને બક્ષવામાં આવશે નહીં અને તેમની સામે ફોજદારી (Criminal) ગુનો પણ દાખલ કરવામાં આવશે.

નાણાં રિકવર કરવા માટેની કવાયત
કૌભાંડની તપાસ માટે બેંકે નીચે મુજબના પગલાં ભર્યા છે:

એકાઉન્ટ ફ્રીઝ: 
જે અન્ય બેંકોમાં આ પૈસા ગેરકાયદેસર રીતે ટ્રાન્સફર કરવામાં આવ્યા હતા, તે તમામ બેંકોને એલર્ટ મોકલીને તે ખાતા પર 'લીન માર્ક' (રોક) લગાવવા સૂચના આપી છે.

ફોરેન્સિક ઓડિટ: 
સમગ્ર મામલાની ઊંડી તપાસ માટે એક સ્વતંત્ર બાહ્ય એજન્સી દ્વારા ફોરેન્સિક ઓડિટ કરાવવાનો નિર્ણય લેવામાં આવ્યો છે.

પોલીસ ફરિયાદ: 
સ્થાનિક પોલીસ પ્રશાસન પાસે સત્તાવાર ફરિયાદ નોંધાવવામાં આવી છે જેથી ગુનેગારોની ધરપકડ થઈ શકે.

​​​​​​​આ કૌભાંડે સરકારી નાણાંની સુરક્ષા અને બેંકિંગ સિસ્ટમની આંતરિક તપાસ પ્રણાલી પર ગંભીર સવાલો ઉભા કર્યા છે. હરિયાણા સરકાર હવે આ મામલે અત્યંત આક્રમક વલણ અપનાવી રહી છે જેથી જનતાના ટેક્સના નાણાં પરત મેળવી શકાય.