અયોધ્યાના રામ મંદિરમાં આયોજિત પ્રાણ પ્રતિષ્ઠા સમારોહમાં અભિનેત્રી કંગના રનૌત ખાસ હાજર રહી હતી. તેણે આ ઘટનાની ઘણી તસવીરો અને વીડિયો સોશિયલ મીડિયા પર પોસ્ટ કર્યા છે. આમાંથી એક તસવીરે નેટીઝન્સનું ધ્યાન ખેંચ્યું હતું. આ તસવીર ‘ઈઝી માય ટ્રિપ’ના ફાઉન્ડર નિશાંત પિટ્ટી સાથે કંગનાની છે.

આ ફોટો જોયા બાદ અફવાઓ ઉડી હતી કે કંગના નિશાંતને ડેટ કરી રહી છે. બોલિવૂડની ‘ક્વીન’એ આખરે આ ચર્ચાઓ પર મૌન તોડ્યું છે. સોશિયલ મીડિયા પર એક પોસ્ટ લખતી વખતે કંગનાએ તેના અંગત જીવન વિશે એક મોટો ખુલાસો કર્યો છે.

બુધવારે કંગનાએ તેની ઇન્સ્ટાગ્રામ સ્ટોરી પર એક સમાચારનો સ્ક્રીનશોટ શેર કર્યો હતો. એવા સમાચાર હતા કે કંગના અને નિશાંત એકબીજાને ડેટ કરી રહ્યા છે. તેણે લખ્યું, ‘મારી મીડિયાને નમ્ર વિનંતી છે કે કૃપા કરીને ખોટી માહિતી ન ફેલાવો. નિશાંત પિટ્ટીજી પરિણીત છે અને હું બીજા કોઈને ડેટ કરી રહી છું. યોગ્ય સમયની રાહ જુઓ અને મહેરબાની કરીને અમને શરમાવે એવું કંઈ ન કરો.

આ પહેલીવાર છે જ્યારે કંગનાએ પોતાના સંબંધો વિશે ખુલીને વાત કરી છે. પરંતુ તેણે હજુ સુધી જાહેર કર્યું નથી કે તે કોને ડેટ કરી રહી છે. આ પોસ્ટમાં તેણે આગળ લખ્યું, ‘માત્ર સાથે ફોટો પડાવવા ખાતર કોઈ યુવતીને રોજ નવા પુરુષ સાથે જોડવી યોગ્ય નથી. મહેરબાની કરીને આવું ના કરો.’ આ પોસ્ટના અંતે તેણે હાથ જોડી ઈમોજી પોસ્ટ કર્યું.

કોણ છે નિશાંત પિટ્ટી?

નિશાંત પિટ્ટી એક બિઝનેસમેન છે. તેણે ફિલ્મ ઈન્ડસ્ટ્રીમાં પ્રોડ્યુસર તરીકે પણ કામ કર્યું છે. તેમના બેનર હેઠળ બોલિવૂડની કેટલીક ફિલ્મોનું નિર્માણ થયું છે. જેમાં ‘મદારી’, ‘બત્તી ગુલ મીટર ચાલુ’, ‘ફન્ને ખાન’ અને કંગના રનૌતની ‘મણિકર્ણિકા’નો સમાવેશ થાય છે. 2020માં તેણે ફિલ્મ ‘તૈશ’ બનાવી હતી.

વડાપ્રધાન નરેન્દ્ર મોદીએ સોમવારે અયોધ્યા મંદિરમાં રામચંદ્રની મૂર્તિની  સ્થાપના કરી. લગભગ આઠ હજાર આમંત્રિતો જેવા કે રાજકારણીઓ, ફિલ્મ ઉદ્યોગના દિગ્ગજ, કેટલાક વરિષ્ઠ લેખકો, ઉદ્યોગસાહસિકો, રમતવીરો તેમજ વિવિધ સંપ્રદાયોના સેંકડો સંતો અભિષેક સમારોહમાં હાજર હતા. રામ મંદિરમાં અભિષેક સમારોહ બાદ કંગના ત્યાંના સંતોને પણ મળી હતી.