જૂનાગઢથી એક અત્યંત આઘાતજનક અને હૃદયદ્રાવક સમાચાર સામે આવ્યા છે. લગ્નના હરખ અને ઉત્સાહ વચ્ચે એક આશાસ્પદ યુવા અશ્વપાલકનું કરુણ મોત નિપજતા સમગ્ર પંથકમાં શોકની કાલીમા છવાઈ ગઈ છે. જૂનાગઢના જાણીતા અશ્વપાલક કરણ પરમારનું વરઘોડાની તૈયારી દરમિયાન બ્રેન સ્ટ્રોક આવતા મોત થયું છે.

ઘોડી નચાવતા જ ઢળી પડ્યો

મળતી માહિતી મુજબ, આ ઘટના ત્યારે બની જ્યારે કરણ પરમાર એક લગ્ન પ્રસંગમાં વરરાજાના ફુલેકા (વરઘોડા) માટે પોતાની ઘોડીને તૈયાર કરી રહ્યો હતો. કરણ પોતાની પ્રિય ઘોડીને દોરીને નચાવી રહ્યો હતો અને આસપાસના લોકો આ દ્રશ્ય નિહાળી રહ્યા હતા. સોશિયલ મીડિયા પર વાયરલ થયેલા વીડિયોમાં જોઈ શકાય છે કે, કરણ પૂરા જોશ અને ઉત્સાહ સાથે ઘોડીને રમાડી રહ્યો હતો, પરંતુ અચાનક જ ગણતરીની સેકન્ડોમાં તે જમીન પર ઢળી પડ્યો હતો.

હોસ્પિટલ પહોંચતા પહેલા જ દમ તોડ્યો

કરણ અચાનક જમીન પર પટકાતા આસપાસ ઉભેલા લોકો અને પરિવારજનો સ્તબ્ધ થઈ ગયા હતા. લોકો તાત્કાલિક તેની મદદ માટે દોડી આવ્યા હતા અને વિલંબ કર્યા વિના તેને નજીકની હોસ્પિટલમાં ખસેડવામાં આવ્યો હતો. જોકે, હોસ્પિટલ પહોંચતા જ ફરજ પરના તબીબોએ તેને તપાસીને મૃત જાહેર કર્યો હતો. તબીબોના જણાવ્યા અનુસાર, યુવાનનું મોત 'બ્રેન સ્ટ્રોક'ને કારણે થયું છે.

એક વર્ષની માસૂમ દીકરીએ પિતાની છત્રછાયા ગુમાવી

મૃતક કરણ પરમારના બનેવી પુજાભાઈ ગોઢાણીયાએ આ કરુણ પ્રસંગ અંગે વિગતો આપતા જણાવ્યું હતું કે, "અમે બંને લગ્નમાં ઘોડીઓ લઈને ગયા હતા. કરણ ઘોડી રમાડતો હતો અને હું પણ સાથે જ હતો. અચાનક તે નીચે પડી ગયો અને અમે તેને હોસ્પિટલ લઈ ગયા, પણ ત્યાં સુધીમાં બધું પૂરું થઈ ગયું હતું."

કરણ તેના પરિવારનો એકનો એક દીકરો હતો. તેના પરિવારમાં તેની માતા, બે બહેનો અને એક વર્ષની નાની દીકરી છે. હસતા-રમતા યુવાનના અકાળે અવસાનથી પરિવાર પર આભ ફાટી પડ્યું છે. જે પિતાના ખભા પર પરિવારની જવાબદારી હતી, તે પિતાની અચાનક વિદાયથી એક વર્ષની માસૂમ બાળકીએ પિતાની છત્રછાયા ગુમાવી છે.

અશ્વપાલક આલમમાં શોકનું મોજું

કરણ પરમાર માત્ર જૂનાગઢ જ નહીં, પરંતુ ગીર સોમનાથ અને અમરેલી પંથકમાં પણ અશ્વપ્રેમી તરીકે ખૂબ જાણીતો હતો. ઘોડીઓને તાલીમ આપવાની તેની આગવી કળા અને અશ્વો પ્રત્યેના પ્રેમને કારણે તે યુવા વર્ગમાં અત્યંત લોકપ્રિય હતો. એક આશાસ્પદ અને ટેલેન્ટેડ યુવાનનું આ રીતે જવું એ અશ્વપાલક સમાજ માટે મોટી ખોટ છે.

સોશિયલ મીડિયા પર વાયરલ થયો વીડિયો

આ સમગ્ર ઘટનાનો લાઈવ વીડિયો સોશિયલ મીડિયામાં વાયરલ થયો છે. વીડિયો જોઈને લોકોની આંખો ભીની થઈ રહી છે. જે રીતે એક ક્ષણે હસતો-રમતો યુવાન પોતાની કળા બતાવી રહ્યો હતો અને બીજી જ ક્ષણે મોતના મોંમાં ધકેલાઈ ગયો, તે જોઈને લોકો સ્તબ્ધ છે.

આ ઘટનાએ ફરી એકવાર યુવાનોમાં વધતા જતા હાર્ટ એટેક અને બ્રેન સ્ટ્રોકના કિસ્સાઓ સામે ચિંતા જન્માવી છે. જૂનાગઢમાં બનેલી આ ઘટનાએ સમગ્ર ગુજરાતના પશુપ્રેમીઓને શોકમાં ગરકાવ કરી દીધા છે.