બ્રાઝિલમાં, શનિવારે (21 ડિસેમ્બર 2024) સવારે લગભગ 4 વાગ્યે BR-116 નેશનલ હાઈવે પર મુસાફરોથી ભરેલી બસ અને ટ્રક વચ્ચે ભયાનક ટક્કર થઈ હતી. ટક્કર બાદ બસમાં આગ લાગી હતી, જેમાં 38 લોકોના મોત થયા હતા.

આ ભયાનક દુર્ઘટના બાદ બ્રાઝિલના રાષ્ટ્રપતિ લુઇઝ ઇનાસિયો લુલા દા સિલ્વાએ પોતાના એક્સ એકાઉન્ટ દ્વારા મૃતકો માટે સંવેદના વ્યક્ત કરી અને ઘાયલો માટે પ્રાર્થના કરી.

ફાયર વિભાગના જણાવ્યા અનુસાર મિનાસ ગેરાઈસ રાજ્યમાં ટીઓફિલો ઓટોની શહેરની નજીકના મુખ્ય BR-116 હાઈવે પર દુર્ઘટના સ્થળેથી તમામ પીડિતોને બહાર કાઢવામાં આવ્યા છે. બસમાં કુલ 45 લોકો મુસાફરી કરી રહ્યા હતા, જેમાંથી બસ ડ્રાઈવર સહિત 38 લોકોના મોત નિપજ્યા છે. આ સિવાય અન્ય ગંભીર રીતે ઘાયલ મુસાફરોને સ્થાનિક હોસ્પિટલમાં મોકલવામાં આવ્યા હતા. અકસ્માત બાદ ટ્રક ચાલક સ્થળ પરથી ફરાર થઈ ગયો હતો. તે જ સમયે અન્ય કારમાં મુસાફરી કરી રહેલા ત્રણ લોકો ટ્રક સાથે અથડાઈ અને તેની નીચે ફસાઈ ગયા હતા.

ફોરેન્સિક તપાસ બાદ અકસ્માતનું કારણ જાણી શકાશે
આ બાબતે સ્થાનિક ફાયર વિભાગે જણાવ્યું હતું કે અનેક સાક્ષીઓના અલગ-અલગ નિવેદનોને કારણે અકસ્માતના કારણની તપાસ કરવા ફોરેન્સિક તપાસની જરૂર પડશે. શરૂઆતમાં અગ્નિશામકોએ જણાવ્યું હતું કે બસનું ટાયર ફાટ્યું હતું, જેના કારણે ડ્રાઇવરે નિયંત્રણ ગુમાવ્યું હતું અને સ્થાનિક સમય અનુસાર સવારે 4 વાગ્યે સ્થાનિક બસ અને ટ્રક વચ્ચે અથડામણ થઈ હતી. આ અકસ્માત BR-116 હાઈવે પર થયો હતો, જે બ્રાઝિલના ગીચ વસ્તીવાળા દક્ષિણ-પૂર્વ વિસ્તારને ગરીબ ઉત્તર-પૂર્વીય વિસ્તાર સાથે જોડતો મુખ્ય માર્ગ છે.