ડોનાલ્ડ ટ્રમ્પના આ આક્રમક પગલાને કારણે એશિયાઈ શેરબજારોમાં મોટો કડાકો જોવા મળ્યો છે. રોકાણકારોમાં ડરનો માહોલ છે કે જો તેલનો પુરવઠો ખોરવાશે તો વૈશ્વિક સ્તરે આર્થિક મંદી આવી શકે છે. સપ્લાય ચેઈન પર તોળાતા જોખમને કારણે આંતરરાષ્ટ્રીય બજારમાં કાચા તેલના ભાવ ઉછળીને પ્રતિ બેરલ 100 ડોલરને વટાવી ગયા છે.

મોંઘવારીમાં થશે અસહ્ય વધારો
બેંકિંગ અને માર્કેટ એક્સપર્ટ અજય બગ્ગાએ જણાવ્યું છે કે જો અમેરિકા અને ઈરાન વચ્ચેની વાટાઘાટો નિષ્ફળ જશે અને નાકાબંધી સંપૂર્ણપણે લાગુ થશે, તો હોર્મુઝનો રસ્તો લગભગ બંધ થઈ જશે. તેલના પુરવઠામાં અવરોધ આવવાથી વૈશ્વિક બજારમાં ભારે અસ્થિરતા આવશે. મોટા રોકાણકારો આ સ્થિતિનો લાભ ઉઠાવી શકે છે, પરંતુ સામાન્ય લોકો અને નાના રોકાણકારો માટે આ સમય અત્યંત જોખમી છે.

આયાત બિલ અને નિકાસ પર અસર
ભારત તેની જરૂરિયાતનું મોટાભાગનું તેલ આયાત કરે છે, તેથી આ સંકટ ભારત માટે વધુ ગંભીર સાબિત થઈ શકે છે. તેલ મોંઘું થવાને કારણે ટ્રાન્સપોર્ટ ખર્ચ વધશે, જેનાથી શાકભાજીથી લઈને જીવનજરૂરી તમામ ચીજવસ્તુઓના ભાવમાં ભડકો થશે. લાલ સમુદ્ર અને ઓમાનની ખાડીમાં શિપિંગમાં સર્જાયેલી અડચણોને કારણે ભારતની અંદાજે 20% નિકાસ (Export) પર અસર પડી છે.

રેમિટન્સમાં ઘટાડો
ખાડી દેશોમાં કામ કરતા અંદાજે 9 લાખ ભારતીયો નોકરી ગુમાવવાને કારણે ભારત પરત ફર્યા છે. આનાથી વિદેશથી ભારત આવતા નાણાં (Remittance) માં ઘટાડો થશે, જેની સૌથી વધુ અસર કેરળ જેવા રાજ્યો પર પડશે.

​​​​​​​હાલમાં ભારત સહિત સમગ્ર વિશ્વ માટે આ કટોકટીનો સમય છે. જો યુદ્ધ જેવી સ્થિતિ લાંબો સમય ચાલશે, તો વૈશ્વિક આર્થિક વિકાસ દર ધીમો પડી જશે. ભારત સરકાર માટે અત્યારે સૌથી મોટો પડકાર આયાત ખર્ચને અંકુશમાં રાખવાનો અને વધતી મોંઘવારીથી સામાન્ય માણસને બચાવવાનો છે.