રાજકોટ-અમદાવાદ હાઇવે પર તરઘડીયા ઓવર બ્રીજ પર હિટ એન્‍ડ રનના બનાવમાં અજાણ્‍યા યુવાનનું ગંભીર ઇજા થવાથી મોત થતા મૃતદેહને પીએમ માટે સિવિલ હોસ્પિટલમાં ખસેડી પોલીસે ઓળખ મેળવવા તજવીજ હાથ ધરી છે.

પ્રાપ્ત વિગત મુજબ તરઘડીયા ઓવર બ્રીજ ઉપરથી મધરાત્રીના પસાર થતા વાહન ચાલકને આશરે ૨૫થી ૩૦ વર્ષનો એક યુવાન લોહીલુહાણ હાલતમાં બેભાન પડયો હોવાનું જોતા તાકીદે ૧૦૮ને જાણ કરતા 108 ઘટના સ્થળે પહોંચી ઇએમટી અને પાઇલોટે યુવાનને બેભાન હાલતમાં સિવિલ હોસ્‍પિટલમાં ખસડયો હતો. જ્યાં ફરજ પરના તબીબે જોઈ તપાસી મૃત જાહેર કરતા હોસ્પિટલ ચોકીના સ્ટાફે કુવાડવા રોડ પોલીસને જાણ કરતાં પોલીસે હોસ્પિટલએ પહોંચી જરૂરી કાર્યવાહી કરી હતી.

બનાવના પગલે પોલીસે મૃતકની ઓળખ થઇ શકે તેવો કાંઈ આધાર ન મળતા પરિવારજનોની શોધખોળ હાથ ધરી છે. પોલીસની પ્રાથમિક તપાસમાં કોઈ અજાણ્યા વાહનની અડફેટે ચડી જતા મોત થયાનું જાણવા મળ્યું છે. મૃતકના કોઇ વાલીવારસ હોય તો કુવાડવા રોડ પોલીસનો મો. ૯૫૩૭૮ ૨૪૯૩૦ સંપર્ક કરવા જણાવાયું છે.