અમદાવાદ સ્થિત આંતરરાષ્ટ્ર્રીય બિઝનેસ ફોરમ, જે દિલ્હી, મુંબઈ, ચેન્નઈ જેવા મુખ્ય શહેરોમાં પણ છે, અને ઈન્ડો અમેરિકન ચેમ્બર ઓફ કોમર્સ ઓફ ગ્રેટર હ્યુસ્ટન, યુએસએ વચ્ચે ભારત અને અમેરિકાના દ્રિપક્ષીય વેપારને મજબૂત બનાવવા માટે એક ઐતિહાસિક એમઓયુ ઉપર હસ્તાક્ષર થયા છે. ફોરમના સચિવ હિરેન ગાંધી અને ચેમ્બરના પ્રતિનિધિ રાજીવ ભવસાર અને કાર્યકારી નિર્દેશક જગદીપ અહલુવાલિયાની ઉપસ્થિતિમાં આ સમજૂતી કરાર થયો હતો.
વિશેષમાં ફોરમના સચિવ હિરેન ગાંધીએ આજકાલ દૈનિક સાથેની વાતચીતમાં જણાવ્યું હતું કે ઉપરોકત કરારના મુખ્ય મુદ્દાઓમાં (૧) દ્રિપક્ષીય વેપાર મજબૂત કરવો, બંને ચેમ્બર વચ્ચે વેપાર, રોકાણ, અને સાંસ્કૃતિક સહકાર વધારવા માટે નિયમિત આયોજન કરવા સહમતી થઇ છે. (૨) રોકાણની તકો જેમાં હિરેન ગાંધી દ્રારા ગુજરાતના મુંદ્રા, પિપાવાવ, અને કંડલા પોર્ટ પર કેન્દ્રિત સહયોગ માટે હ્યુસ્ટન પોર્ટ ઓથોરિટી સાથે અલગથી એમઓયુ કરવા સૂચન કરાયું છે.
જગદીપ અહલુવાલિયાએ જણાવ્યું હતું કે, ૨૦૨૫માં ટ્રમ્પ સરકારની સંભવિત રચનાથી ભારત માટે અમેરિકામાં વધુ તકો ઉપલબ્ધ થશે, ખાસ કરીને યારે અમેરિકામાં ચીનની સામે ભારતને પ્રાધાન્ય મળશે.
બંને બિઝનેસ ફોરમ દ્રારા રોકાણની માર્ગદર્શક પદ્ધતિઓ, જેમ કે ઇબી–૫ વિઝા માટે વકીલોની ચકાસેલી મદદ, એફડીઆઈ માર્ગદર્શન અને ટેકસ સહાયતા સહિત અન્ય સેવાઓની વ્યવસ્થા કરવા સહમતી થઇ છે.
તદઉપરાંત ત્રીજો મહત્વપૂર્ણ મુદ્દો જેમાં વિવિધ ક્ષેત્રો ઉપર ફોકસ કરાશે, જેમાં ફાર્મા, ટેકસટાઇલ, કૃષિ, આઈટી, ફડ પ્રોસેસિંગ, બિલ્ડિંગ મટિરીયલ, રિયલ એસ્ટેટ, કેમિકલ્સ, પ્લાસ્ટિક, અને ગાર્મેન્ટ જેવા સેકટરમાં વિશેષ પ્રવૃત્તિ હાથ ધરવા સંકલ્પ કરાયો હતો. બંને ચેમ્બર દ્રારા સાંસ્કૃતિક મેલમિલાપ વધારવા પણ પ્રયાસ કરાશે