ગુજરાતની લાંબી દરિયાઈ સીમા પર ફરી એકવાર હલચલ જોવા મળી છે. અમરેલી જિલ્લાના જાફરાબાદના દરિયાઈ વિસ્તારમાં એક અજાણી અને શંકાસ્પદ બોટ દેખાયા બાદ સમગ્ર પોલીસ તંત્ર અને કોસ્ટગાર્ડ હાઈ એલર્ટ પર આવી ગયા છે. આ ઘટનાને પગલે પીપાવાવ મરીન પોલીસ દ્વારા મધદરિયે પેટ્રોલિંગ શરૂ કરવામાં આવ્યું છે અને કોસ્ટગાર્ડ દ્વારા દમણથી હેલિકોપ્ટર બોલાવીને સઘન સર્ચ ઓપરેશન હાથ ધરવામાં આવ્યું છે.

પ્રાપ્ત માહિતી અનુસાર, જાફરાબાદના દરિયામાં માછીમારી કરી રહેલા સ્થાનિક માછીમારોને એક શંકાસ્પદ બોટ દેખાઈ હતી. માછીમારોએ તેને રોકવાનો પ્રયાસ કરતા તે બોટ પૂરપાટ ઝડપે ફરાર થઈ ગઈ હતી. આ ઘટનાની ગંભીરતા સમજીને માછીમારોએ તાત્કાલિક કોસ્ટગાર્ડને જાણ કરી હતી.

કોસ્ટગાર્ડ દ્વારા આ માહિતી મળતાની સાથે જ દમણથી હેલિકોપ્ટર બોલાવીને દરિયામાં સર્ચ ઓપરેશન શરૂ કરાયું હતું. હેલિકોપ્ટરને જોઈને શંકાસ્પદ બોટ વધુ ઝડપથી ભાગી રહી હોવાનું સામે આવ્યું છે, જેણે સુરક્ષા એજન્સીઓની ચિંતામાં વધારો કર્યો છે.

આ ઘટનાની ગંભીરતાને ધ્યાનમાં રાખીને અમરેલીના ધારાસભ્ય હીરા સોલંકી પણ તાત્કાલિક જાફરાબાદ બંદર પર પહોંચ્યા હતા. તેમણે વાયરલેસ મારફતે મધદરિયે માછીમારી કરી રહેલા માછીમારો સાથે વાતચીત કરી હતી અને અંદરની સ્થિતિ તેમજ શંકાસ્પદ બોટ અંગે વિગતવાર માહિતી મેળવી હતી.

​​​​​​​હાલમાં, પીપાવાવ મરીન પોલીસની બોટ દ્વારા દરિયામાં સઘન પેટ્રોલિંગ ચાલી રહ્યું છે. આ ઉપરાંત, દરિયાકાંઠાના તમામ લેન્ડિંગ પોઈન્ટ્સ પર પોલીસ દ્વારા ચાંપતી નજર રાખવામાં આવી રહી છે. કોસ્ટગાર્ડ દ્વારા શંકાસ્પદ બોટને પકડવાના પ્રયાસો તેજ કરવામાં આવ્યા છે, પરંતુ હજુ સુધી આ બોટ અંગે કોઈ ચોક્કસ માહિતી મળી નથી કે તે કયા દેશની છે અથવા તેનો ઇરાદો શું હતો.

ગુજરાતની સંવેદનશીલ દરિયાઈ સીમા પર આ પ્રકારની ઘટનાઓ સુરક્ષા એજન્સીઓ માટે હંમેશા પડકારરૂપ રહી છે. શંકાસ્પદ બોટના કારણે દરિયાઈ સુરક્ષા એજન્સીઓ વધુ સતર્ક બની છે અને સમગ્ર દરિયાકાંઠાના વિસ્તારમાં સુરક્ષા વ્યવસ્થા વધુ સઘન બનાવવામાં આવી છે.