બ્રાઝીલમાં ડ્રગના વધતા કારોબારને નાથવા અને ડ્રગની હેરફેર કરતા માફીયાઓના નેટવર્કને તોડી પડવા પોલીસે ખાસ ઓપરેશન શરુ કર્યું છે.આ ઓપરેશન રિયો ડી જાનેરો શહેરમાં ચાલુ છે. અહીં યુદ્ધ જેવી પરિસ્થિતિ પેદા થઇ છે. રિયો ડી જાનેરો લાંબા સમયથી કોમાન્ડો વર્મેલ્હો અને ટેર્સેરો કોમાન્ડો પુરો જેવા ડ્રગ લોર્ડ્સના નિયંત્રણ હેઠળ છે. ડ્રગ ટ્રાફિકિંગ સિન્ડિકેટ ચલાવતા કોમાન્ડો વર્મેલ્હોને બ્રાઝિલમાં રેડ કમાન્ડો તરીકે ઓળખવામાં આવે છે.આ ગેંગ માત્ર ડ્રગ હેરફેરમાં જ નહીં પરંતુ ગેરકાયદેસર હથિયારોની હેરફેર, જમીન કબજે કરવા અને સ્થાનિકો પાસેથી "સુરક્ષા કર" ઉઘરાવવામાં પણ સામેલ છે.આ આખા નેટવર્કને ભેદવા રિયોના મેયર અને રાજ્ય સરકારે "ઓપરેશન રિયો પેસિફિડો" નામનું ઓપરેશન શરૂ કર્યું છે.પોલીસ હેલિકોપ્ટરથી બોમ્બમારો કરી રહી છે, જ્યારે ડ્રગ માફિયા ડ્રોન બોમ્બથી પોલીસ પર હુમલો કરી રહ્યા છે.

પોલીસની ગોળીબારમાં સાઠ ડ્રગ હેરફેર કરનારા માર્યા ગયા છે, જ્યારે શક્તિશાળી અને સમાંતર સરકાર ચલાવતા ડ્રગ હેરફેર કરનારાઓએ પણ પોલીસને નિશાન બનાવ્યું છે, જેના પરિણામે ચાર પોલીસકર્મીઓ માર્યા ગયા છે. આ ઓપરેશનમાં અત્યાર સુધીમાં કુલ 64 લોકો માર્યા ગયા છે.

રિયો સરકાર અનુસાર, આ ઓપરેશનમાં આશરે 2,500 પોલીસ અને લશ્કરી કર્મચારીઓ સામેલ હતા. આ કાર્યવાહીનો હેતુ રિયોના મુખ્ય ડ્રગ ટ્રાફિકિંગ ગેંગ, "કોમાન્ડો વર્મેલ્હો" ને નિશાન બનાવવાનો હતો, જે શહેરના ગરીબ વિસ્તારોમાં કાર્યરત છે.

રિયોના ઇતિહાસમાં સૌથી મોટું ઓપરેશન પાર પડયું

પોલીસે ડ્રગ ટ્રાફિકિંગ કરનારાઓ પર કાર્યવાહી કરવા માટે હેલિકોપ્ટર અને આર્મર્ડ વાહનોનો ઉપયોગ કરીને દરોડા પાડ્યા. આ કાર્યવાહી દરમિયાન ભારે ગોળીબાર થયો અને અનેક આગ લાગી. પોલીસે આશરે 81 શંકાસ્પદોની ધરપકડ કરી, જેમાં ચાર પોલીસ અધિકારીઓ સહિત આશરે 60 માફિયા સભ્યો માર્યા ગયા. પોલીસે 75 થી વધુ રાઇફલ્સ અને મોટી માત્રામાં ડ્રગ્સ પણ જપ્ત કર્યા. આ કાર્યવાહીને રિયોના ઇતિહાસમાં સૌથી મોટી અને લોહિયાળ કામગીરી તરીકે વર્ણવવામાં આવી રહી છે. પોલીસ ડ્રગ માફિયાઓને સંપૂર્ણપણે નાશ કરવાના મિશનને અનુસરી રહી છે અને તેમના ઠેકાણાઓ પર દરોડા પાડી રહી છે.પોલીસે મોટી માત્રામાં કોકેન (200 કિલો), રોકડ રકમ અને કેટલાક શસ્ત્રો જપ્ત કર્યા.

માફિયાઓએ 50 થી વધુ બસો હાઇજેક કરી અને ટ્રાફિક રોક્યો

ગેંગના સભ્યોએ પોલીસ પર ડ્રોન હુમલા કર્યા. તેઓએ અનેક સ્થળોએ રસ્તાઓ અવરોધિત કર્યા, 50 થી વધુ બસો હાઇજેક કરી અને ટ્રાફિકને અવરોધિત કર્યો. રિયોની શેરીઓ યુદ્ધ જેવી લાગી. શેરીઓમાં ઘણા ગુંડાઓના મૃતદેહ પડેલા મળી આવ્યા. ભય અને આતંકનું વાતાવરણ એટલું તીવ્ર હતું કે નજીકની શાળાઓ અને યુનિવર્સિટીઓ બંધ કરી દેવામાં આવી હતી.

રેડ કમાન્ડોનો લોહિયાળ ભૂતકાળ

"કોમાન્ડો વર્મેલ્હો", અથવા રેડ કમાન્ડો, બ્રાઝિલની સૌથી જૂની અને સૌથી પ્રભાવશાળી માફિયા ગેંગ છે. તેની સ્થાપના 1970 ના દાયકામાં જેલમાં રાજકીય કેદીઓના જૂથ તરીકે કરવામાં આવી હતી પરંતુ હવે તે એક આંતરરાષ્ટ્રીય ડ્રગ ટ્રાફિકિંગ નેટવર્ક બની ગયું છે. માફિયાઓના પ્રાદેશિક વિસ્તરણને રોકવા માટે આ કામગીરી એક વર્ષથી વધુ સમયથી આયોજન અને અમલમાં મૂકવામાં આવી રહી છે.

રિયોમાં ટુક સમયમાં યોજાવાની છે યુએન ઇવેન્ટ

બ્રાઝિલના રિયો ડી જાનેરોમાં ડ્રગ માફિયાઓ સામે મોટી કાર્યવાહી કરવામાં આવી રહી છે, કારણ કે શહેર ટૂંક સમયમાં યુનાઇટેડ નેશન્સ ક્લાઇમેટ કોન્ફરન્સ સંબંધિત મહત્વપૂર્ણ વૈશ્વિક કાર્યક્રમોનું આયોજન કરવાનું છે. નવેમ્બરના પહેલા અઠવાડિયામાં રિયોમાં સી40 ગ્લોબલ મેયર્સ સમિટ અને પ્રિન્સ વિલિયમનો અર્થશોટ પ્રાઇઝ યોજાવાનો છે.આ મોટી ઘટનાઓ પહેલા શહેરની સુરક્ષાને નિયંત્રિત કરવા, અશાંતિ અટકાવવા અને ડ્રગ્સની હેરફેરને રોકવા માટે આવી કડક કાર્યવાહી જરૂરી માનવામાં આવે છે. ડ્રગ માફિયા અને સંગઠિત ગુનાના વધતા પ્રભાવથી ચિંતા થઈ ગઈ છે, તેથી આંતરરાષ્ટ્રીય મહેમાનો અને પર્યાવરણીય પરિષદોના આગમન દરમિયાન રિયોની સલામતી અને શાંતિ સુનિશ્ચિત કરવા માટે પોલીસ આ પગલાં લઈ રહી છે.