કેરળમાં ગઈકાલથી ચોમાસું બેસી ગયું છે. હવામાન વિભાગના જણાવ્યા પ્રમાણે, કેરળમાં આ વર્ષે ચોમાસાની આઠ દિવસ વહેલી શરૂઆત થઈ છે. કેરળમાં ચોમાસું બેસવાની સત્તાવાર તારીખ એક જૂન છે. આ વર્ષે મે મહિનાની શરૂઆતમાં જ હવામાન વિભાગે જાહેરાત કરી હતી કે દેશમાં ચોમાસાની વહેલી શરૂઆત થશે અને 27મેની આસપાસ ચોમાસું કેરળ પહોંચે એવી શક્યતા છે. હવામાન વિભાગે ગુજરાતના કેટલાક વિસ્તારોમાં આગામી પાંચ દિવસ ભારે વરસાદની આગાહી આપવામાં આવી છે. આ સાથે માછીમારોને દરિયો ન ખેડવા માટેની સૂચના આપી છે. 

આજે આ 10 જિલ્લામા ભારે વરસાદની આગાહી

હવામાન વિભાગની આગાહી મુજબ, આજે જૂનાગઢ, અમરેલી, ભાવનગર, ગીર સોમનાથ, નર્મદા, સુરત, તાપી, નવસારી, ડાંગ, વલસાડમાં છૂટાછવાયા સ્થળોએ ગાજવીજ સાથે ભારે વરસાદ પડવાની આગાહી છે. આ સ્થળો પર યલો એલર્ટ જાહેર કરવામાં આવ્યું છે.

26 મેએ આ જિલ્લામાં વરસાદનું યલો એલર્ટ 

જ્યારે સોમવારે 26 મેના રોજ અમરેલી, ભાવનગર, નવસારી, તાપી, ડાંગ, વલસાડ જિલ્લાના છૂટાછવાયા સ્થળોએ ગાજવીજ સાથે ભારે વરસાદને પગલે યલો એલર્ટ જાહેર કરવામાં આવ્યું છે.

27 મેએ 8 જિલ્લામાં ભારે વરસાદની આગાહી 

27 મેના રોજ 8 જિલ્લામાં ભારે વરસાદની હવામાનની આગાહી છે. અમરેલી, ભાવનગર, છોટા ઉદેપુર, નર્મદા, તાપી, ડાંગ, નવસારી, વલસાડ તથા 28 મેના રોજ નવસારી, વલસાડ, દાહોદ, છોટા ઉદેપુર, અમરેલી, ભાવનગર જિલ્લામાં યલો એલર્ટ જાહેર કર્યું છે. એટલે કે આ જિલ્લાઓમાં છૂટાછવાયા સ્થળોએ ગાજવીજ સાથે ભારે વરસાદ પડવાની આગાહી છે.

ગુજરાતમાં 24 કલાકમાં 37 તાલુકામાં વરસાદ નોંધાયો

ગુજરાતમાં 24 કલાક (ગઈકાલે સવારે 6 વાગ્યાથી આજે સવારના 6 વાગ્યા સુધી)માં 37 તાલુકામાં વરસાદ નોંધાયો છે. સૌથી વધુ વાપીમાં 36 મિમિ, નવસારીમાં 32 મિમિ, વાસંદામાં 29 મિમિ પલસાણામાં 24 મિમિ વરસાદ પડ્યો હતો