મુંબઈ, થાણે, નવી મુંબઈ, પનવેલ તેમજ રત્નાગીરી-સિંધુદુર્ગના ગ્રામીણ વિસ્તારોમાં શાળાઓ અને કોલેજો સતત બીજા દિવસે પણ  બંધ રહેશે, કારણ કે ભારતીય હવામાન વિભાગે આ વિસ્તારો માટે વરસાદને લઈને રેડ એલર્ટ જાહેર કર્યું છે. ભારતીય હવામાન વિભાગના અધિકારીએ કહ્યું કે આ નિર્ણય પ્રાથમિક અને માધ્યમિક શાળાઓ તેમજ જુનિયર અને સિનિયર કોલેજોને લાગુ પડશે. પુણે જિલ્લાના ભાગોમાં ભારે વરસાદ વચ્ચે, સ્થાનિક વહીવટીતંત્રે મંગળવારે તમામ શાળાઓ અને જુનિયર કૉલેજના વિદ્યાર્થીઓ રજા જાહેર કરી હતી. મુંબઈમાં ભારે વરસાદને કારણે જનજીવન પ્રભાવિત થયું છે.

મહારાષ્ટ્રના મુંબઈ, થાણે, રાયગઢ, પાલઘર, રત્નાગીરી અને સિંધુદુર્ગ જિલ્લામાં ભારે વરસાદની આગાહીને કારણે, મુંબઈ યુનિવર્સિટીમાં આજે યોજાનારી તમામ પરીક્ષાઓ મુલતવી રાખવામાં આવી છે. નવી તારીખો ટૂંક સમયમાં જાહેર કરવામાં આવશે.
મુંબઈમાં લોકલ ટ્રાફિક હવે થોડો સામાન્ય થઈ રહ્યો છે. થાણેથી કલ્યાણ સુધીની ધીમી લોકલને શરુ કરવામાં આવી છે, પરંતુ ફાસ્ટ લોકલ 15થી 20 મિનિટ મોડી ચાલી રહી છે. થાણેથી ઉપડતી કર્જત, કસારા ટ્રેનો રદ કરવામાં આવી રહી છે. જેથી સાંજના સમયે કામ પરથી ઘરે પરત ફરતી વખતે પણ શ્રમજીવી વર્ગને અસર થઈ હોવાનું જણાય છે. થાણેમાં પ્લેટફોર્મ નંબર 1 પર પાણી ભરાવાને કારણે સીએસટી જતી ટ્રેનોને પ્લેટફોર્મ નંબર 4 પર ડાયવર્ટ કરવામાં આવી રહી છે.
ભારે વરસાદને કારણે વડાલા સ્ટેશન પર પાણી ભરાઈ ગયા છે. આવી સ્થિતિમાં હાર્બર લાઇનની સેવાઓ થોડીવાર મોડી ચાલી રહી છે. થાણે, કલ્યાણ, ડોમ્બિવલી અને બદલાપુરમાં રાતથી વરસાદ બંધ થઈ ગયો છે. આવી સ્થિતિમાં મધ્ય રેલવેની લોકલ ટ્રેનો સુચારૂ દોડી રહી છે.

મુંબઈ, મહારાષ્ટ્રમાં સતત બીજા દિવસે પણ ભારે વરસાદ ચાલુ છે. દરમિયાન હાર્બર લાઇનના ટ્રેક પર પાણીનું સ્તર ઓછુ થતાં સવારે 4.30 કલાકે કામગીરી શરૂ કરવામાં આવી હતી. મુખ્ય લાઇનની ઝડપી અને ધીમી બંને લોકલ ટ્રેનો નિર્ધારિત સમય કરતાં 2-3 મિનિટ મોડી દોડી રહી છે અને હાર્બર લાઇનની લોકલ ટ્રેનો હવે લગભગ સમયસર દોડી રહી છે.