અલ્હાબાદ હાઈકોર્ટની લખનૌ બેંચે કોંગ્રેસ નેતા અને લોકસભામાં વિપક્ષના નેતા રાહુલ ગાંધીની નાગરિકતાના વિવાદ પર નાગરિકતા અધિનિયમ-1955 હેઠળ નોંધાયેલી ફરિયાદ પર કેન્દ્ર સરકાર પાસેથી કાર્યવાહીની વિગતો માંગી છે. કેસની આગામી સુનાવણી 30 સપ્ટેમ્બરે થશે.

આ આદેશ જસ્ટિસ રાજન રોય અને જસ્ટિસ ઓમ પ્રકાશ શુક્લાની ખંડપીઠે કર્ણાટક ભાજપના કાર્યકર એસ. વિગ્નેશ શિશિરની પિટિશન પર પાસ થઈ હતી. જુલાઈ મહિનામાં કોર્ટે એ જ અરજદારની અરજીને ફગાવી દીધી હતી કે જો તે ઈચ્છે તો નાગરિકતા કાયદા હેઠળ સક્ષમ અધિકારીને ફરિયાદ કરી શકે છે.

રાહુલ ગાંધીને ગણાવ્યા બ્રિટિશ નાગરિક

અરજદાર વતી દલીલ કરવામાં આવી હતી કે, તેમની પાસે બ્રિટિશ સરકારના ઘણા દસ્તાવેજો અને કેટલાક ઈ-મેલ છે જે સાબિત કરે છે કે રાહુલ ગાંધી બ્રિટિશ નાગરિક છે. આ કારણોસર તેઓ ચૂંટણી લડવા માટે અયોગ્ય છે અને લોકસભાના સભ્યનું પદ સંભાળી શકતા નથી.

CBIમાં કેસ નોંધવાની માંગ

અરજીમાં રાહુલ ગાંધીની બેવડી નાગરિકતા ધારણ કરવી એ ભારતીય ન્યાય સંહિતા અને પાસપોર્ટ એક્ટ હેઠળ ગુનો છે અને કેસ નોંધવા અને સીબીઆઈને તપાસ કરવાનો આદેશ આપવાની પણ માંગ કરવામાં આવી છે. અરજદારનું કહેવું છે કે, તેણે બેવડી નાગરિકતા અંગે સક્ષમ અધિકારીને બે વખત ફરિયાદો મોકલી હતી, પરંતુ કોઈ પગલાં ન લેવાયા હોવાથી હાલની અરજી દાખલ કરવામાં આવી રહી છે.

બેન્ચે કહ્યું કે, કેન્દ્ર સરકારના ડેપ્યુટી સોલિસિટર જનરલ એસ.બી. પાંડે એ હકીકત જણાવે કે શું અરજદારની ફરિયાદો સક્ષમ અધિકારીને મળી છે અને જો હા, તો ફરિયાદો પર શું કાર્યવાહી કરવામાં આવી રહી છે?