રાજકોટ શહેરમાં આજે બપોરે મેઘાડંબર અને અસહ્ય બફારા વચ્ચે હળવું ઝાપટું વરસી જતા અડધો કલાકમાં અડધો ઇંચ વરસાદ નોંધાયો હતો. વરસાદના પગલે વાતાવરણમાં ઠંડક પ્રસરી જતા શહેરીજનોએ ગરમીથી રાહત મેળવી હતી. બીજી બાજુ શહેરના રાજમાર્ગો ઉપર વરસાદી પાણીના નિકાલની કોઇ વ્યવસ્થા જ ન હોય ફક્ત અર્ધો ઇંચ વરસાદમાં પણ યાજ્ઞિક રોડ અને રેસકોર્સ રિંગ રોડ સહિતના રાજમાર્ગો ઉપર પાણી ભરાયા હતા.
વિશેષમાં મ્યુનિ.સૂત્રોમાંથી પ્રાપ્ત વિગતો મુજબ, આજે બપોરે બે વાગ્યાની સ્થિતિએ સેન્ટ્રલ ઝોનના કનક રોડ ફાયર સ્ટેશનમાં 9 મીમી, વેસ્ટ ઝોનના કાલાવડ રોડ ફાયર સ્ટેશનમાં 12 મીમી અને ઇસ્ટ ઝોનના બેડીપરા ફાયર સ્ટેશનમાં 9 મીમી વરસાદ નોંધાયો હતો. આગામી 24થી 72 કલાકમાં સામાન્યથી ભારે વરસાદની આગાહી છે.દરમિયાન રાજકોટ શહેરને પીવાનું પાણી પુરૂ પાડતા આજી-1માં 0.10 ફૂટ નવા નીરની આવક થઇ છે, જ્યારે કાલાવડ રોડ ઉપરના ન્યારી-1 ડેમ તેમજ ભાદર-1 ડેમની સપાટી પણ યથાવત રહી છે.