રાજ્યમાં આજે એટલે કે સોમવારે તાપમાનમાં ગઈકાલ રવિવારના પ્રમાણમાં આંશિક ઘટાડો જોવા મળ્યો હતો. આજે રાજ્યના અનેક શહેરોનું તાપમાન 44 ડિગ્રીને પાર થયું છે. જેમાં પાટનગર ગાંધીનગરમાં સૌથી વધુ તાપમાન નોંધાયું હતું.

ગુજરાતમાં હીટવેવની આગાહી હવામાન વિભાગે કરી હતી તે મુજબ આજે રાજ્યના મોટાભાગના શહેરોનું તાપમાન 44 ડિગ્રીને પાર પહોચી ગયું હતુ. સુરેન્દ્રનગરમાં આજે તાપમાનનો પારો 44.3 ડિગ્રીએ પહોચ્યો હતો.

મહત્વનું છે કે રાજ્યના પાટનગર ગાંધીનગરમાં આજે રાજ્યની સૌથી વધુ ગરમી નોંધાઈ. ગાંધીનગરમાં ગરમીનો પારો 45 ડિગ્રીએ પહોચ્યો. જ્યારે અમદાવાદની વાત કરીએ તો અમદાવાદ શહેરમાં 44.5 ડિગ્રી ગરમી નોંધાઈ. જો કે અમદાવાદ એરપોર્ટ પર ગરમીનો પારો 46.2 ડિગ્રીએ અટક્યો હતો.

અમરેલીમાં આજે દિવસનું મહત્તમ તાપમાન 44 ડિગ્રી નોંધાયું છે. વડોદરામાં 44. 2 ડિગ્રી, ભાવનગરમાં પણ 44.2 ડિગ્રી તાપમાન નોંધાયું છે. ભૂજમાં ગરમીનો પારો 41.2 ડિગ્રી, ડીસામાં 43.2 ડિગ્રી, રાજકોટમાં 43 ડિગ્રી, સુરતમાં 38.5 ડિગ્રી તાપમાન નોંધાયું છે.