અમદાવાદની ખ્યાતિ હોસ્પિટલ કૌભાંડ બાદ ખોટી રીતે PMJAYનો લાભ લેનારી હોસ્પિટલો સામે સરકારે લાલ આંખ કરી છે. દરમિયાન, PMJAY યોજનામાંથી રાજ્યની વધુ 15 હોસ્પિટલને સસ્પેન્ડ કરવામાં આવી હોવાની માહિતી સામે આવી છે. ક્લેમમાં ચેડા, સાધન સામગ્રીનો અભાવ સહિતનાં કારણો હેઠળ આ કાર્યવાહી કરવામાં આવી છે.

વધુ 15 હોસ્પિટલોને PMJAYમાંથી સસ્પેન્ડ કરાઈ
અમદાવામાં ખ્યાતિ હોસ્પિટલ દ્વારા કડીમાં મેડિકલ કેમ્પ યોજી PMJAY હેઠળ જરૂરિયાત ન હોવા છતાં 19 લોકોની એન્જિયોગ્રાફી કરાઈ હતી. ત્યારબાદ હૃદયમાં સ્ટેન્ટ મૂકાયા હતા. 19 પૈકી 2 દર્દીનાં મોત થતાં હોબાળો થયો હતો. ત્યારબાદ વધુ એક દર્દીનું સારવાર દરમિયાન મોત થયું હતું. ખ્યાતિ હોસ્પિટલનાં સમગ્ર કૌભાંડનો પર્દાફાશ થયો હતો. આમ, અયોગ્ય રીતે PMJAY લાભ લેનારીઓ હોસ્પિટલ સામે સરકારે કડક કાર્યવાહી શરૂ કરી છે. દરમિયાન, રાજ્યની વધુ 15 હોસ્પિટલોને PMJAYમાંથી સસ્પેન્ડ કરવામાં આવી છે.

આ હોસ્પિટલોને PMJAY યોજનામાંથી સસ્પેન્ડ કરાઈ

1. ઓલિમ્પસ હોસ્પિટલ, રાજકોટ
2. વેદ હોસ્પિટલ, ખેડા
3. ચિત્રા મેડિકલ સેન્ટર, ભાવનગર
4. પરિવાર જનરલ હોસ્પિટલ, ભાવનગર
5. પ્લસ પ્લસ મલ્ટી હોસ્પિટલ, ભાવનગર
6. સબિહા સાર્વજનિક જનરલ હોસ્પિટલ, બોટાદ
7. નવજીવન હોસ્પિટલ, અમરેલી
8. કલરવ હોસ્પિટલ, અમરેલી
9. આર.એન. વાળા સ્મારક ટ્રસ્ટ હોસ્પિટલ, ગીર સોમનાથ
10. ધી. ધાચી આરોગ્ય મંડળ, અરાવલી
11. શિફા મલ્ટી સ્પેશિયલિટ હોસ્પિટલ, અમદાવાદ
12. મોદી ચિલ્ડ્રન હોસ્પિટલ, કાકરાપાર-તાપી
13. મોદી ચિલ્ડ્રન હોસ્પિટલ, તાપી
14. અનાહટ હાર્ડ ઇન્સ્ટી એન્ડ સ્પે. હોસ્પિટલ, મહેસાણા
15. અનાહટ હાર્ડ ઇન્સ્ટી એન્ડ સ્પે. હોસ્પિટલ, મહેસાણા

ક્લેમમાં ચેડા, સાધન સામગ્રીનો અભાવ સહિતનાં કારણો હેઠળ કાર્યવાહી
માહિતી અનુસાર, આ 15 હોસ્પિટલો સામે ક્લેમમાં ચેડા, સાધન સામગ્રીનો અભાવ સહિતનાં કારણો હેઠળ આ કાર્યવાહી કરવામાં આવી છે. સ્ટેટ એન્ટી ફ્રોડ યુનિટ દ્વારા આ હોસ્પિટલમાં દરોડા પાડીને તપાસ કરતા અનેક ક્ષતિઓ સામે આવી હતી. નોંધનીય છે કે, ખ્યાતિકાંડ બાદ PMJAY સાથે જોડાયેલ તમામ હોસ્પિટલની એક બાદ એક તપાસ કરવામાં આવી રહી છે.