શહેરમાં ફરજીયાત હેલ્મેટ પહેરવાના નિયમની બે દિવસ કડક અમલવારી બાદ હવે માત્ર હાઇવે પર ટાર્ગેટ પુરા કરવા માટે કેસ કરી વાહન ચાલકોને દંડ કરવામાં આવી રહ્યા છે. તો સીટી વિસ્તારમાં સીસીટીવી મારફતે પણ હેલ્મેટ વગરના વાહન ચાલકો ઝપટે ચડી રહ્યા છે. સાઇલેન્ટ મોડમાં ચાલતી હેલ્મેટની દંડનીય કાર્યવાહી વચ્ચે આજે પોલીસે ફરી માથું ઉચક્યું હતું અને સરકારી કચેરીઓ મહાપાલિકા, બહુમાળી ભવન, કલેક્‍ટર કચેરી, સીપી ઓફિસ પાસે જ સરપ્રાઈઝ ડ્રાઈવ યોજી હેલ્મેટ વગર કચેરીમાં આવતા મોટાભાગના અધિકારીઓ- કર્મચારીઓ ઝપટે ચડી જતા દંડ ફટકારવામાં આવ્યો હતો. આ ઉપરાંત કેટલાક અરજદારો પણ પોલીસની ડ્રાઈવમાં ઝપટે ચડી ગયા હતા.

પોલીસ સૂત્રોના જણાવ્યા મુજબ દરરોજ એક એક સરકારી કચેરી ખાતે દરરોજ ત્રણ ત્રણ કલાક હેલ્‍મેટ ડ્રાઇવ યોજાશે.આ પ્રકારની હેલ્‍મેટ ડ્રાઇવ રાખવામાં આવશે. સરકારી અધિકારીઓ, કર્મચારીઓ નિયમ પાળતાં થશે તો બીજા શહેરીજનો પણ નિયમનું પાલન કરશે. આજે કલેક્‍ટર કચેરી ખાતે આ કામગીરીનો આરંભ થયો હતો. હેલ્‍મેટ વગર આવેલા અને દંડાયેલા કર્મચારીઓ- અરજદારોમાં કચવાટ જોવા મળ્યો હતો