સરકારી અને ગ્રાન્ટેડ કોલેજોમાં વિદ્યાર્થીનીઓ પાસેથી કોઈ પ્રકારની ટ્યુશન ફી લેવામાં આવતી નથી. પરંતુ સરકારે થોડા સમય પહેલા કરેલા પરિપત્ર મુજબ ગ્રાન્ટેડ અને સરકારી કોલેજોમાં વિદ્યાર્થીનીઓ પાસેથી પણ લાઇબ્રેરી ફી, લેબોરેટરી ફી જેવા પ્રકારની ફી વસૂલી શકાય છે. પરંતુ આવી ફી ટ્યુશન ફી કરતાં વધુ ન હોવી જોઈએ.

સરકારે કરેલા આ ફેરફારને ધ્યાનમાં રાખી સૌરાષ્ટ્ર યુનિવર્સિટીએ આ અંગે એક પરિપત્ર બહાર પાડીને સરકારી તથા ગ્રાન્ટેડ કોલેજોને આ પ્રકારની સરકારે જે છૂટ આપી છે તે મુજબની ફી વિદ્યાર્થીનીઓ પાસેથી પણ વસુલવા જણાવ્યું છે. આ પ્રકારની ફી ટ્યુશન ફી કરતા વધુ ન થઈ જાય તે જોવા માટે પણ તાકીદ કરી છે.

અત્યારસુધી મોટાભાગની કોલેજો એડમિશનમાં મેરીટ લીસ્ટ બનાવતી

અત્યારસુધી મોટાભાગની કોલેજો પોતાને અનુકૂળ લાગે તે મુજબ એડમિશનમાં મેરીટ લીસ્ટ બનાવતા હતા. પરંતુ નવી શિક્ષણ નીતિ અને સરકારી યુનિવર્સિટીઓ માટેના અલગ સ્ટેચ્યુટ તથા ઓર્ડિનન્સ પસાર કર્યા પછી હવે કોલેજોની આવી મનમાની નહીં ચાલે, મેરીટ લીસ્ટ એડમિશન માટે કેવી રીતે તૈયાર કરવું તેની સૂચના સરકારે તમામ યુનિવર્સિટીઓ અને કોલેજોને મોકલી આપી છે, આગામી દિવસોમાં જ્યારે ગુજરાત કોમન એડમિશન સિસ્ટમ (જીકાસ) દ્વારા પ્રવેશ આપવામાં આવશે ત્યારે સ્નાતક કક્ષાના વિદ્યાર્થીઓને પ્રવેશ આપતા પહેલા પ્રિપેરેશન ઓફ મેરીટ લીસ્ટ બાબતે જાણકારી આપવાની રહેશે તેમ પણ યુનિવર્સિટી દ્વારા દરેક કોલેજોને જણાવાયું છે.

જીકાસ દ્વારા આ સંદર્ભે એક ગાઈડ લાઈન પણ પ્રસિદ્ધ કરવામાં આવી

જીકાસ દ્વારા આ સંદર્ભે એક ગાઈડ લાઈન પણ પ્રસિદ્ધ કરવામાં આવી છે અને તેમાં જ્યારે કોઈ વિદ્યાર્થીને સમાન મેરીટ હોય ત્યારે કવોલિફાઇગ એક્ઝામમાં થિયરીમાં મેળવેલા માર્કની ગણતરી કરવા અથવા તો પ્રેક્ટીકલ માર્ક જો હોય તો તેની ગણતરી કરવા અથવા તો એસએસસી કે તેને સમકક્ષ પરીક્ષાના એગ્રીગેટ માર્કની ગણતરી કરવા અથવા ડેટ ઓફ બર્થ ધ્યાનમાં લઈને વધુ ઉંમર હોય તેવા વિદ્યાર્થીને અગ્રતા આપવા જણાવાયું છે.