ભારતીય વાયુસેનાના સ્થાનિક રીતે બનાવેલા કોમ્બેટ એરક્રાફ્ટ માટે એસ 404 એન્જિનની ડિલિવરી માર્ચ 2025 સુધી લંબાવવામાં આવી: એન્જિનોની સપ્લાય 2023થી શ થવાની હતી

જેટ એન્જિનની ડિલિવરીમાં વિલંબને કારણે ભારત સરકાર જનરલ ઈલેક્ટ્રિક કંપ્ની પર દંડ ફટકારશે. આ બાબતથી વાકેફ એક અધિકારીએ જણાવ્યું કે આ એન્જિનનો ઉપયોગ દેશના હળવા-લડાયક વિમાનમાં થાય છે. અધિકારીએ નામ ન આપવાની શરતે જણાવ્યું હતું કે, ભારતીય વાયુસેનાના સ્થાનિક રીતે બનાવેલા હળવા કોમ્બેટ એરક્રાફ્ટ માટે એસ 404 એન્જિનની ડિલિવરી તારીખ માર્ચ 2025 સુધી લંબાવવામાં આવી છે.
આ એન્જિનોની સપ્લાય 2023થી શરૂ થવાની હતી. દેશની સરકારી કંપ્ની હિન્દુસ્તાન એરોનોટિક્સ લિમિટેડે 716 મિલિયન ડોલરમાં 99 એસ404 એન્જિનના સપ્લાય માટે જનરલ ઇલેક્ટ્રિક કંપ્ની સાથે કરાર કર્યો હતો. આ વિલંબ નરેન્દ્ર મોદી સરકારની ફાઈટર જેટ બનાવવાની યોજનાને અવરોધી શકે છે. પાકિસ્તાન અને ચીન સાથે ભારતના સંબંધો તંગ છે. જનરલ ઈલેક્ટ્રિકે ભારતના નેક્સ્ટ જનરેશન લાઇટ-કોમ્બેટ એરક્રાફ્ટ માટે જેટ એન્જિન મેળવવા માટે ગયા વર્ષે જૂનમાં હિન્દુસ્તાન એરોનોટિક્સ સાથે કરાર કર્યો હતો.
સંરક્ષણ મંત્રાલય અને હિન્દુસ્તાન એરોનોટિક્સે આ અંગે કંઈપણ કહેવાનો ઈન્કાર કર્યો હતો. જીઈ એરોસ્પેસે ઈમેલના પ્રતિભાવમાં જણાવ્યું હતું કે ઉદ્યોગમાં સપ્લાય ચેઈન પર ભારે દબાણ છે અને કંપ્ની આ પડકારને પહોંચી વળવા માટે કામ કરી રહી છે. જીઈ એરોસ્પેસ વૈશ્વિક સ્તરે જેટ એન્જિનના પુરવઠામાં સમસ્યાનો સામનો કરી રહી છે અને આવા એન્જિનોની ડિલિવરીમાં વિલંબ ચાલુ છે. ભારતના ફાઈટર જેટ્સની તાકાત ઝડપથી ઘટી રહી છે. ભારતીય સેના રશિયા પાસેથી મળેલા તેના જૂના એરક્રાફ્ટને રિટાયર કરી રહી છે. રશિયા ભારતને મિલિટરી હાર્ડવેરનો સૌથી મોટો સપ્લાયર છે. જોકે, તાજેતરના વર્ષોમાં ખરીદીમાં મંદી જોવા મળી રહી છે.