ભારતીય ક્રિકેટ ટીમને નવા મુખ્ય કોચ મળી ગયા છે. BCCIએ ગૌતમ ગંભીરની મુખ્ય કોચ તરીકે નિમણૂંકની જાહેરાત કરી છે. 

ભારતીય ટીમના પૂર્વ ઓપનર ગૌતમ ગંભીર રાહુલ દ્રવિડના સ્થાને ભારતના મુખ્ય કોચ બનશે. 42 વર્ષીય ગંભીર વર્ષ 2007 અને 2011 વર્લ્ડ કપ જીતનાર ભારતીય ટીમના ભાગ હતા. આ સાથે તેમની મેન્ટરશિપ હેઠળ KKRએ IPL 2024નો ખિતાબ જીત્યો હતો. તેની કેપ્ટન્સીમાં કોલકાતા બે વખત આઈપીએલ ચેમ્પિયન પણ બની ચુક્યું છે.

જય શાહે કરી પોસ્ટ

બીસીસીઆઈના સચિવ જય શાહે સોશિયલ મીડિયા પર પોસ્ટ કરીને ગંભીરની મુખ્ય કોચ તરીકે નિમણૂકની જાહેરાત કરી હતી. તેણે લખ્યું- હું ખૂબ જ ખુશ છું કે હું ભારતીય ક્રિકેટ ટીમના નવા મુખ્ય કોચ તરીકે ગૌતમ ગંભીરનું સ્વાગત કરું છું. આધુનિક સમયમાં ક્રિકેટનો ઝડપથી વિકાસ થયો છે અને ગૌતમે તેને નજીકથી જોયો છે. તેમની સમગ્ર કારકિર્દી દરમિયાન તેમણે અનેક પડકારોનો સામનો કરીને પોતાની ભૂમિકા ભજવી છે. મને વિશ્વાસ છે કે ભારતીય ક્રિકેટને આગળ લઈ જવા માટે ગૌતમ આદર્શ વ્યક્તિ છે.